Beyonce-i'n a hlawh hnem
American singer Beyoncé Knowles chuan Isha Ambani leh Anand Piramal te pre-wedding ceremony-a a perform aṭang khan $mtd 4 vel bawr a hlawh niin an sawi. Hei hi India pawisa chuan cheng vaibelchhe 28 vel a ni a, a bawn rem rem hle.
Beyonce hi December 9 khan India-ah lo kalin, Udaipur-a Isha leh Anand te pre-wedding ceremony-ah a perform a nih kha. India-a chah lut tur khan Mukesh Ambani-a'n sum eng zat nge a thehchhuah ang tih chu mi tam tak hriat chak a ni a, tunah chuan a chhanna a awm ta a ni.
India leh Asia khawmualpuia hausa ber Ambani hian $mtd 4 vel zet a seng a, hei hi khawvel huap pawhin a namai lo hle. Ambani hian a fanu pasal neihna atan hian $mtd 100 vel zet a ruahman a, chung zinga eng emaw zat chu Beyonce hian a lo ei hek a ni.
Beyonce koh kal nana an sum sen hi a namai lo hle a, kumina Coachella festival-a a inlan ṭuma a sum hlawh zat zet an pe a ni. Beyonce hian Coachella festival-ah hian $mtd 4 vel bawk hi a hlawh a, vawi khat inlana a sum lakluh tam ber te zinga mi a ni hial. 'Single Ladies' singer Beyonce hi kum 2017 khan hmeichhe zaithiam zinga kum khata sum lalut hnem ber a ni tih hriat tel a ṭha bawk awm e.
American singer Jennifer Lopez chu hmeichhe zinga vawi khat inlana sum lalut hnem ber chelh mektu a ni thung a, $mtd 5 zet a lalut. Hei hi India pawisa chuan vaibelchhe 35 vel zet a tling a ni. Mariah Carey ($mtd 1.5) leh Christina Aguilera ($mtd 1) te chu sum lalut tam zual an ni bawk.
Hetih lai hian Texas-a billionaire pakhat chuan a kum 60 tlin lawmna-ah English Rock band lar Rolling Stones te chu sawmin, $mtd 7 zet a pe a, hei hi record ding lai a ni.