'Justice League' Zack Snyder's Cut teaser hmasa ber

Boruak nei lian, 'Justice League' Zack Snyder's cut teaser footage hmasa ber chu director hian a twitter-ah a dah chhuah tawh bakah HBO Max lam pawhin an YouTube channel-ah thlir theih turin an dah chhuak tawh, ngaihven a hlawh nghal.

Zack Snyder chuan Ningani khan a twitter-ah second 30 leka rei teaser hi a tichhuak a, HBO Max hi nakkum lama pe­chhuaktu tur a ni bawk.

Fan-te'n an nghah­hlelh em em, campaign hial neia an sual chhuah 'Justice League' Zack Snyder's cut teaser hmasa berah hian Diana Prince chiah a lang a, 'Justice League' film pangngaia scene kan la hmuh ngai loh a ni nghal pawp a, Joss Whedon khan scene paih a ngah hle nia an sawi chu thil tak tak a nih hmel. Darkseid hmuh tur a awm bawk. Diana hian meichher kengin Darkseid-a lem hlauthawng taka a thlir lai hmuh tur a awm a, a hnuah Darkseid a lo lan chhunzawm bawk a ni.

Snyder hian a twitter-ah hian DCFandome-ah Justice League version thar tura mi chu tam zawk hmuh tur a la awm dawn tih a tarlang tel bawk.

Justice League-ah khan Steppenwolf kha main villian ni mah se Snyder hian DC comics-a villain lar ber Darkseid hi a version-ah hian a lang dawn tih a lo sawi lawk tawh.

"Thil thar hlak a ni dawn a, a bikin movie tlangzarh tak en tawhte chuan thil thar an en dawn a ni," tiin Snyder hian a lo sawi lawk tawh a, teaser hmasa ber aṭang hian thil thar hlir hmuh tur a awm nghal a ni.

Zack Snyder hi a fanu thihna avangin kum 2017-a tlangzarh tak 'Justice League' production zawhfel hma khan a inhnukdawk a, Avengers: Age of Ultron director Joss Whedon chuan a ai awh zuiin scene tam tak a shoot ṭhat tir bakah Snyder-a kut hnu tam tak a paih bawk. 

Hei vang hian fan-te chuan Snyder cut tlangzarh hi an phut a, social media lamah nasa taka campaign-in fan-te campaign hi a changtute ngei pawhin an thlawp a; May thla khan Snyder chuan Warner Bros -in ama version chu tihchhuah a phalsak ta tih sawiin nakkumah HBO Max-ah tlangzarh a ni dawn tih a sawi ta a ni.