Model of the Year Kaia Gerber Menghan Markle-in mipui a barakhaih

Kum tina sem ṭhin British Fashion Award chu Thawhṭanni zan khan Royal Albert Hall, London-ah sem a ni leh ta a, American model Kaia Gerber chu Model of the Year atan thlan a ni.

Hetih lai hian Duchess of Sussex, Meghan Markle chu rin loh takin he show-ah hian a inlan a, mipui a barakhaih hle.

Gerber a naupang tawh lo!
British Fashion Award-a mi­mala langsar ber tih ngam chu Kaia Gerber a ni. Gerber hi American model lar chuai thei lo Cindy Crawford-i fanu a ni a, kum 17 mi chauh a la ni. Hetih chung hian a eizawnna tur line a thlang fuh tih a chiang reng tawh a, a nu hnung a zui zo hle dawn niin a lang.

Award ceremony-ah hian kum 52 mi Cindy Crawford hian a fanu hi a ṭawiawm a, red carpet an la zawh dun zak zak a ni. Red carpet an zawh dun lai pawh hian thla latuten an bawr nasa hle a, mipui mit fukna ber pakhat an ni.

Clare Waight Keller a duai lo
British stylist leh fashion de­sig­ner lar Clare Waight Kel­ler chuan mi bik anih zia a pholang nawn leh ta a, British Designer of the Year (Womenswear) award a dawng.

Fashion company Given­chy-a an mi chhuanvawr Clare Keller hi Price Harry leh Meghan Markle te inneih ṭum a, Markle-i thuam design-tu kha a ni. British Fashion Award-ah pawh hian Markle nen hian an inlan dun nghe nghe a, mipui lawm an hlawh hle a ni.

Hetih lai hian British fa­shion designer, Craig Green chu British Designer of the Year (Menswear) atan thlan a ni. Georgian fashion desig­ner Demna Gvasalia chu Acce­ssories Designer of the Year atan thlan a ni a, Italian luxury brand lar Gucci chu Brand of the Year atan thlan a ni.

Mipuiin Markle an lawm
British Fashion Award-ah hian mipuiin khual ṭha an nei a, a hming chu Meghan Markle a ni. Duchess of Sussex Markle inlan tur thu hi puan lawk a ni lo a, mipui pawh a barakhaih hle a ni.

Markle hian thu a sawi a, sawi zui hlawh ber erawh a nau pai thu a ni. Markle hian nau a pai thu October thla khan puan a lo ni tawh a, a pum a puar tawh viau a ni. Nakkum March/April velah chuan fa an neih a rinawm.

British Fashion Award-ah hian model lar tak tak eng emaw zat an inlan a, chung zingah chuan American model Kendall Jenner pawh a tel. David Beckham leh a nupui Victoria Beckham te pawh an inlan bawk.

Show hi British model Alek Wek leh comedian Jack Whitehall te chuan an host a, Kate Moss, Edie Campbell, Riz Ahmed leh Rita Ora te pawh an inlan a ni.

British Fashion Award hi kum 1989 aṭang daih tawh khan sem ṭan a ni a, hlut pawh a hlawh hle a ni. Kum 2016 khan a hming hi Fashion Award tia thlak a ni.