Aizawl-ah Guns 2 Roses an lo kal leh dawn!

Kan la hre ṭheuh awm e, nikum khan Aizawl-ah concert nei turin an lo chuang chhuak a, amaherawh chu programme ṭan hnu lawkah vanduaina thlen avangin show tih tawp a ngai ta a nih kha. An lo intiam tawh ang ngeiin Guns N' Roses tribute band, Guns 2 Roses te chu Aizawl-ah an lo chuang chhuak leh dawn.

December 19 hian Lammual-ah Pawl Kut hman a ni dawn a, he hunah hian Guns 2 Roses te hi an inlan dawn a ni. Anni bakah hian India band ṭha Parikrama te pawh an perform dawn bawk a, nghahhlehawm tawh tak a ni.

Parikrama te hi International band Nazareth ten Aizawl-a concert an neih ṭum khan opening an chang a, mahse heimi ṭum pawh hian eng emaw rokhawlhna avangin hla hnih khat bak an sa hman lo a nih kha. An tih tur la zo loah an inngaih avangin Aizawl-ah an lo kal nawn leh dawn a, rimawi hmanga Zoram mipui min rawn awih tei an tum leh dawn a ni.

Pawl Kut-ah hian naupang pual leh puitling pualin hun hman a ni a, Guns 2 Roses leh Parikrama te hi puitling puala hun hman hunah an inlan dawn a ni. Thu lawmawm tak awm chu- an concert hi a thlawnin a en theih dawn a, hmaih phal chi a ni lo vang.