Record thar nen 'Sonic the Hedgehog 2'-in ro a rel
Box Office chart-ah beisei phak bakin 'Sonic the Hedgehog 2'-a che ṭha a, record chhinchhiah tlak tak a siam nghal.
'Sonic the Hedgehog 2' sum lakluh a tam
Zirtawpni liam ta khan US-ah tlangzarh a ni a, kar tawp liam ta chhung khan theatre 4,234-ah chhuah niin $72,105,176 lai sum a lalut hem mai. Ram dang aṭanga a sum lakluh zat nena belhkhawm phei chuan $146,442,990 lai a lalut tawh.
Tlangzarh a nih aṭangin kar khat em pawh a la liam loa, chuti chung chuan kumin chhunga film tlangzarh, sum lalut tam pasarihna a ni hem tawh mai.
James Marsden, Tika Sumpter, Natasha Rothwell, Adam Pally, Shemar Moore, Colleen O'Shaughnessey, Lee Majdoub, Idris Elba leh Jim Carrey-te channa film hi critics lamin an fak a, Rotten Tomatoes lamah review 122 aṭangin rating 6/10 a hmu.
A record siam chu
'Sonic the Hedgehog 2' hian video game adaptation film, tlangzarh kar tawp ni thum chhunga sum lalut tam ber record a siam. He record lo chelh hmasatu chu a film hmasa 'Sonic the Hedgehog' kha a ni a, ama record vek a rawn khum pawh a tih theih awm e. 'Sonic the Hedgehog' khan 'Detective Pikachu' record siam a rawn khum thung.
'Detective Pikachu' khan tlangzarh kar tawp ni thum chhungin $mtd 54 a hmu chhuak a, 'Sonic the Hedgehog' $mtd 58 vel a lalut thung a ni. Tunah erawh 'Sonic the Hedgehog 2' hian video game adaptation film, tlangzarh kar tawp ni thum chhunga sum lalut tam record hi a chelh deuh reng rih a rinawm.
'Ambulance' sawi ang
Director lar Michale Bay-a film siam 'Ambulance' chu film review-tu lamin fak tlangpui mah se sum a lalut tam lutuk lo. $mtd 40 vel senga an siam film hi theatre 3,412-ah chhuah niin kar tawp liam ta khan North America Box Office aṭangin $8,699,630 chiah a lalut. Palina a ni phak hram. Ram dangah erawh a che ṭha phian tho a, a sum lakluh tawh zawng zawng zat belhkhawm chu $31,905,375 a ni.
Box Office top 10:-
1 Sonic the Hedgehog 2 $72,105,176
2 Morbius $10,201,332
3 The Lost City $9,027,813
4 Ambulance $8,699,630
5 The Batman $6,458,465
6 Everything Everywhere All at Once $6,059,263
7 Uncharted $2,634,821
8 Spider-Man: No Way Home $626,327
9 Dog $514,606
10 Sing 2 $225,090