Rebecca Lallawmsangi'n Digital Audio Streaming aṭangin sum eng zat nge a lakluh?

Mizo rimawi khawvelin hma a sawn ve zel a, technology lamin hma a sawn ve zel bawk nen, tunah chuan khawvel ramdanga an tih theih ang thil hrang hrang a tih ve theih tawh. Chumi kal zelah chuan Mizo zaithiamte pawhin streaming platform an hmang ṭangkai zel a, sum lakluhna ber pakhatah an hmang mek zel a nih hi maw!

Tunlai Mizo lengzem artist lar ber zinga mi Rebecca Lallawmsangi chuan Blue Wave Records Label kaltlangin Digital Audio streaming Platform hrang hrangah a hla a dah a, chuta ṭang chuan Rs 62,577 lai sum a hmu tawh.

Blue wave Records hi Mizorama Digital Music Distributor awm hmasa ber leh awmchhun St Ange nen thawk dunin zaithiam enge maw zat tunah hian an buaipui sak mek a ni.

Rebecca-i hi a hlate an dahsak satliah mai loa, royalty awm thei um zui sakin a claim theih ang ang an claim sak a, midangin a hla an hman hawhna zawng zawng aṭang pawhin sum hi an claim vek thei a, chuta ṭang chuan thla li vel lekah hetiang zat sum hi a lalut tawh.

Streaming platform hi sap hla kan cover-a a hlawkna anmahniin an rawn tel daih ang kha a ni vek tawh a, zaithiam, musician leh hla phuah thiamte tan chuan hmabak eng tak neih theihna a ni.

YouTube-a an hla upload sak tawh lo tura inngen ai chuan copyright claim-a, royalty awm thei ang ang khan awmzia a nei tawh zawk niin Bza, Blue Wave Records chuan Vanglaini a hrilh a, "Rebecca Lallawmsangi hla pawh hi lo react-tu leh lyric video lo siam ve tawp ang chi te, lam nana lo hmangte, program lo upload thleng pawn a hlawkna kha an claim-sak vek a, Rebecca khan ṭhut hmunah a hla hmangin a hui ve thei tawh a ni," Rebecca-i hlawkna tel dan chungchang a sawi a ni.