Fiamthu thiam Gilbert Gottfried a thi

American stand-up comedian leh lemchan thiam ni bawk Gilbert Gottfried chu kum 67 mi niin Thawhlehni khan muscular dystrophy chi khat myotonic dystrophy type 2 natna vangin hun rei tak enkawl a nih hnuah a thi.

Gilbert Gottfried thih thu hi a chhungte chuan Twitter kaltlangin an puangzar a, chumi hnuah chuan milar tam takin an ui thu an tarlang nghal a ni.

Gottfried hian a fiamthu thiam vanga mi hriat hlawh ni mah se lemchan lamah sulhnu tam tak a hnutchhiah a, chung zingah chuan Aladdin animated film leh series kha a larpui ber awm e. Aladdin-a vaki Lado aw kha Gottfried aw hi a ni a, Teenage Mutant Ninja Turtles-a Kraang Subprime pawh kha a aw niin Problem Child film-ah pawh khan a inlan bawk. Film 60 vel zetah a sulhnu hmuh tur a awm hial.