Rorel lai an kiang a, Roreltu thar an rawn chhuak

Billboard 200 chart-ah Red Hot Chili Peppers album thar 'Unlimited Love' chu pakhatna a ni a, single chart lamah erawh Harry Styles 'As It Was' a langsar hle thung

Rock band chuai thei lo Red Hot Chili Peppers album 'Unlimited Love' chu Billboard album chart-ah a che ṭha hle a, single chart lamah Glass Animas 'Heat Waves' rorelna tihtawp a ni ve ta a, Harry Styles hla thar 'As It Was' a hit hle thung a, chart hrang hrangah ro a rel.

Chuai thei lo RHCP an la chuai lo
An band din aṭangin kum 39 a ral tawh a, chuti chuan US mipui album chart ngaihhlut Billboard 200 chart-ah topper an la ni thei. April thla tira an tlangzarh, an studio album 12-na 'Unlimited Love' chu chart chung berah an dinpui vang a ni.

MRC Data aṭanga a lan dan chuan kar hmasa Ningani thleng khan equivalent album units 97,500 hmu chhuakin chuta ṭanga 82,500 lai chu album an hralhna aṭangin a ni, On demand stream aṭangin unit 14,500 vel hmu chhuakin kar hmasa chhung khan vawi maktaduai 18.96 vel stream a ni. Rock music leh blues music lam hi a tlangpuiin stream a tam lutuk lo ṭhin a, album erawh an la hralh ṭha ṭhin hle. Hip hop leh pop lam erawh album an hralh tam lutuk loa, stream a tam ṭhin thung.

Red Hot Chili Peppers album thar 'Unlimited Love' hi Top Album Sales chat, Top Current Album Sales chart, Vinyl Albums chart-ah bakah Top Rock Album leh Top Alternative Albums chart lamah pawh pakhatna a ni. Artist 100 chart lamah pawh RHCP hi pakhatna an ni bawk.

Harry Styles 'As It Was' a hit
Single chart hrang hrangah Glass Animas 'Heat Waves' a vawk lal len hnuah Harry Styles chuan 'As It Was' hmangin a rawn nek chhuak ta.

Harry Styles 'As It Was' hi Hot 100 chart-ah topper a ni a, Billboard Global Excl. US leh Billboard Global 200 lamah pawh pakhatna a ni bawk. Artist 100 chart lamah erawh Harry Styles hian RHCP a tluk lo deuha, pahnihna a ni.

The Hot 100 top 5:-
1 As It Was Harry Styles
2 Heat Waves Glass Animals
3 Big Energy Latto
4 Stay The Kid LAROI & Justin Bieber
5 Enemy Imagine Dragons X JID

Billboard 200 chart top 10:-
1 Unlimited Love Red Hot Chili Peppers
2 7220 Lil Durk
3 Encanto Soundtrack
4 Dangerous: The Double Album Morgan Wallen
5 Sour Olivia Rodrigo
6 The Highlights The Weeknd
7 2 Alive Yeat
8 Certified Lover Boy Drake
9 Mainstream Sellout Machine Gun Kelly
10 Planet Her Doja Cat