Nominee puan a ni ta December 20 zanah sem a ni dawn

Zonet buatsaih Ṭhazual Award chu December 20 zan hian Dawrpui Auditorium-ah sem a ni leh dawn ta a, nomineee pawh puan a ni ta.

Ṭhazual Award hi kum tina sem ṭhin a ni a, Zorimawi khawvelah chuan award ngaihlut ber te zinga mi a ni. Kuminah hian category hrang 10 a awm dawn a, Best Song Writer a awm thar dawn a ni.

Award dawng thei tur te chu
Kuminah hian award dawng thei tura chawpchhuah hi group leh mimal 50 zet an ni a, an ṭha tlang hle. Nilaini zan khan nominee hi puan niin, gospel leh lengzem/lenglawng hunga zaithiam kan neih ṭhat ber ber te hming a lang. Hei tak hi a tingaihnawm zualtu tur a ni dawn a, award pawh a tihlu zual hle dawn a ni.

Category ngaihnawm tak tak a awm nual dawn a, chung zingah chuan Best Female Artist Gospel leh Best Female Artist Lengzem te pawh a tel. Heng category-ah hian zaithiam kan neih ṭhat tak takte hming a lang nual a, an inbuk tawk tlang hle tura ngaih a ni.

Lengzem huangah
Lengzem lamah hian artist an ṭha ṭheṭhaw hle a, 'top artist' ṭhiau hming a lang a ni. Award ngaihlut ber te zinga mi Best Male Artist la thei turin - Manuna, Mathlenga, Kim­kima, Thiamchantira leh Henry Lalmalsawma Renthlei te an lang a, dawng awm tak tak vek an ni. Heng mite hi Ṭhazual chart-ah pawh vawi eng emaw zat lo lang tawh te an ni a, award dawng tur ber pawh rinthiam harsa tak a ni.

Hmeichhe lamah pawh Best Artist award dawng thei tur chawp­­chhuah te hi an hrawl hle a - Zorinzuali Khiangte, DJ Lalven­himi, Feli Fanai, Rachel Lalnunkimi leh Josephine Lalawmpuii te an ni nawk. Zorini music video kan hmuh ṭhin te chu sawi zui vak pawh ngai lo khawpa belhchian dawn an ni hlawm a, DJ Lalvenhimi lah 'a ni aia ṭha an awm chuang lo ang' tih tur zinga mi a ni.

Lengzem singer zingah chuan Feli Fanai tluka mipui lawm hlawh an awm lo ang ti ila kan sawi sual awm lo ve. Ani hian music video ṭha tak tak min chawpchhuah sak ṭhin a, award dawng tur pawhin a khan viau bawk.

Mizo Idol star Rachel Lalnun­kimi hi tun hnaiah nasa takin a rawn invawrh a, award a dawng zo ang em tih chu thil hriat chakawm tawh tak a ni. Ṭhazual chart-a vawi duai lo No.1 lo hauh tawh Josephine Lalawmpuii hmuh hmaih chi a ni lo a, a sulhnu enin nominee zing a tel hi thil mak a ni lo.

Hetih rual hian Best New Artist dawng thei tura chawpchhuahte pawh en liam ngawt chi an ni lo va, David Lalremruata, HT Lal­thanzami, KR Robert, Ramzauvi leh Jenny Jathang te zingah tunge ṭha ber tih chu bukin a awm dawn a ni. Kumina music video chhuak zingah khawi nge ṭha ber tih pawh hriat chakawm tak a ni a, Sangkimi Khiangte, David, Dj-i, PUC leh Rachel Lalnunkimi te an inel dawn. Best Music Video hi award ngaihhlut ber te zinga mi a nih avangin ngaihven pawh a hlawh hle.

Gospel lam ve thung hi...
Gospel singer zingah Amtea, Zorinsanga leh Jennie Lalruatfeli Ralte te chu mimala langsar an ni a, category pahnih-ah ṭheuh an hming a lang.

Amtea hi Best Male Artist leh Best Music Video award dawng thei dinhmunah a ding mek a, Zorina pawh hetiang tho hi a ni. Amtea leh Zorina te hian award eng emaw zawk chu an humhaw ngei a rinawm viau bawk.

Jennie Lalruatfeli Ralte hi mi ṭhenkhat chuan kan la hmel­hriat lutuk lo mai thei a, a zai ngaithla tawh te erawh chu an zawng­chhang viau thung. Ani hi Best New Artist award la thei tur zingah chawpchhuah a ni a, Lalhma­ngaihzuali (Nunui), R. Lalrin­mawii, Felfeli Ralte leh Lalnunpuii Kawlni te nen an inel dawn a ni.

Best Male Artist dawng tura chawpchhuah dang te chu - Thawh­lehnaniropuia, Sawmtea Chhangte leh Bka te an ni a, hmeichhe lamah Grace Lalchhanhimi, Mawitei Ralte, Ruthu CVL Muanpuii, Hlim­hlimi leh Stacy VL Muanpuii te chu Best Female Artist Gospel dawng thei tura chawpchhuah te an ni.

Best Music Video nominee te hi Amtea 'Adonai', Henry Varte 'A sawm che', Zorinsanga 'Min hual reng ṭhin', Jennie Lalruatfeli 'Thuneihna I ta' tih leh Valtea 'Ka fak a che' tih te a ni a, chawimawina dawng tur hriatthiam a harsa rih hle.

Tunge hla phuah thiam ber?
Kum danga la awm ngai lo Best Songwriter chu kumin aṭangin thlan a ni dawn a, award dawng hmasa bertu nih a chawkawm khawp ang le. He category-ah hian - Myztic Sailo, Dina Jathang, Parpuii Chawngthu, Kima Chhangte leh Faith Lalduatmawii te hming a lang a, tunge hla phuah lama talent nei ṭha ber tih chu hriatin a awm thuai dawn. Anni hi tunlai fakna hla leh lengzem/lenglawng hla thar tam zawk phuahtute an ni a, an sulhnu pawh a namai lo hle.

Tunlai hlaphuah tiam zingah hriat hlawh tak tak an awm chho zel a, tun ṭuma nominee te pawh hi kan hmelhriat sa te an ni furin a rinawm.

Best Duo/Group lam pawh a ngaihnawm viau dawn a, Seraphic Choir, Various Artist (I chakna ringin), Govt. Complex KTP, Euphony leh Manuna & Feli Fanai te hming a lang a, kum hmasa lama he chawimawina dawngtu One In Christ te hmel hmuh tur a awm lo thung a ni.

BEST MALE ARTIST LENGZEM
Manuna
Mathlenga
Kimkima
Thiamchantira
Henry Lalmalsawma Renthlei
BEST FEMALE ARTIST LENGZEM
Zorinzuali
DJ Lalvenhimi
Feli Fanai
Rachel Lalnunkimi
Josephine Lalawmpuii
BEST MALE ARTIST GOSPEL
Amtea
Zorinsanga
Thawhlehnaniropuia
Sawmtea
Bka
BEST FEMALE ARTIST GOSPEL
Grace Lalchhanhimi
Mawitei Ralte
Ruthu CVL Muanpuii
Hlimhlimi
Stacy VL Muanpuii
BEST NEW ARTIST GOSPEL
Jennie Lalruatfeli Ralte
Lalhmangaihzuali (Nunui)
R. Lalrinmawii
Felfeli Ralte
Lalnunpuii Kawlni
BEST NEW ARTIST LENGZEM
David Lalremruata
HT Lalthanzami
KR Robert
Ramzauvi
Jenny Jathang
BEST DUO/GROUP
Seraphic Choir
Various Artist (I chakna ringin)
Govt. Complex KTP
Euphony
Manuna & Feli Fanai
BEST SONGWRITER
Myztic Sailo
Dina Jathang
Parpuii Chawngthu
Kima Chhangte
Faith Lalduatmawii

BEST MUSIC VIDEO GOSPEL
Amtea - Adonai
Henry Varte - A sawm che
Zorinsanga - Min hual reng thin
Jennie Lalruatfeli - Thuneihna I ta
Valtea - Ka fak a che
BEST MUSCI VIDEO LENGZEM
Sangkimi Khiangte - In tello chuan
David - Jerusha
Dji - Ni thar duhawm
PUC - Zoram Rohlu
Rachel Lalnunkimi - Mai a lum e