HBO Max Movie ‘The Wonder Twins’-ah KJ Apa leh Isabel May

Riverdale star KJ Apa leh 1883 actress Isabel May-te chu HBO Max Movie ‘The Wonder Twins’-ah an chang dun dawn.

‘The Wonder Twins’ hi DC comedy live-action-a siam tur a ni a, Apa hi Zan lemah a chang dawn a, May hi Jayna lemah a chang thung dawn a ni.

Film siamtu lam chuan a plot an la tarlang loa, chutih rual erawh chuan DC Comics Universe aṭangin an character tur erawh eng emaw chen a hriat theih. Jayna chu ramsaa chang thei a ni a, Zan erawh a landan tidanglam thei a ni.

Zan leh Jayna character hi Hanna-Barbera 'The All-New Super Friends Hour'-ah an lang hmasa ber a, chumi hnuah chuan 'The World’s Greatest Super Friends, Super Friends and Super Friends: The Legendary Super Powers Sho'-ah an lang leh bawk. A hnuah erawh DC Comics Univers lamah seng luh an ni a, animated series 'Teen Titans Go!' leh live-action TV series 'Smallville'-ahte pawh an character hi chu hmuh tur an lo awm tawh bawk.

‘The Wonder Twins’ Black Adam leh Rampage co-writer Adam Sztykiel film direct hmasa ber tur a ni a, tun nipui chhung hian Atlanta-ah chang ṭan hman an tum.

KJ Apa hi CW/WBTV series Riverdale-a Archie lema a chan aṭangin hriat a hlawh hle a, film lar tak tak- 'A Dog’s Purpose' leh 'I Still Believe'-ahte pawh a inlan tawh a ni. Isabel May pawh hi lemchan lamah a sulhnu hmuh tur a awm nual tawh a, series lar tak 'Young Sheldon'-ah pawh a chang a ni.