Jon Batiste hmel lemchan lamah kan hmu dawn

Kumin Grammy awards semnaa che ṭha tak, award pawm haw tam ber Jon Batiste chu 'The Color Purple' film an siam thar leh turah a inlan dawn.

'The Color Purple' hi a film hming ang chiah lehkhabu, Alice Walker ziah behchhana siam tur niin a lehkhabu pawh hian kum 1983 khan Pulitzer Prize for Fiction award a lo dawng tawh hial a ni. Kum 1985 khan film-a siam ni tawhin a hlawhtling hle nghe nghe a, tunah hian an rawn thar thawh leh dawn a ni.

Steven Spielberg, Oprah Winfrey leh Quincy Jones-te chu producer zingah an tel dawn. Jon Batiste hian kumin Grammy-ah khan award panga lai a dawng a, chung zingah chuan award ngaihhlut 'Album of the Year' pawh a tel.