Coffee Nite-a Hmingtea hla sak tur lo tem lawk rawh le!

Salvation Army, Temple Corps SAY ten kum tina an buatsaih ṭhin Coffee Nite chu kuminah pawh ropui taka neih a ni leh dawn a, zaithiam te pawh an inbuatsaih nasa tawh hle.

Coffee Nite pual hian Mizo mipa zaithiam zing­a mipui lawm hlawh ber te zinga mi, Hmingtea Chhangte chuan hla thar a rawn nei rup mai le. Hmingtea hla thar hi 'I lawm ang u' tih a ni a, nizan khan YouTube-ah a duh a piang en theih turin upload a ni.

He hla hi a satu Hming­tea phuah niin, music pawh hi ama kutchhuak vek a ni. Recording hi Thangbawiha, EME Record a ni thung a, shooting hi Aron Bliss-ah nei a ni bawk. Hmingtea music video-ah hian Tea Chhakchhuak, Peace of Mind Project chuan tha a thawh hnem hle bawk a, video hmuhnawm tak pawh hi a kutchhuak a ni.

Hmingtea chuan, "Coffee Nite-ah hian ka lo perform ve fo tawh a, nuam pawh ka ti hle a ni. Kuminah pawh sawmna duhawm tak ka dawng leh a, ka phur tawh tak zet a ni. Keima irawm chhuak ngei hla thar sak ka duh avangin ka inbuatsaih ngawrh hle a, mipui sakpui theih tura ka peihfel hman hi ka lawm hle a ni," a ti.

Hmingtea hian zaia sawm­tu a ngah ṭhin hle a, a hun chep tak karah Coffee Nite puala hla thar a tichhuak thei hi a fakawm hle a ni.