Ṭhazual Award 2018 Milar ten designer kutchhuak an inbel dawn

Kumtina sem ṭhin Ṭhazual Award chu December 20 zan hian sem a ni leh dawn ta a, milar te pawhin an thawmhnaw hak tur an thlang fel leh tawh hlawm.

Zaithiam leh model ten Mizo designer lar tak tak kutchhuak an inbel dawn a, Mizo event-ah hetianga designer wear an hak nasat hi a la awm kher lo mai thei. Music Award a nih piah lamah fashion event lian tak pakhat a ni dawn a, Mizo designer zinga hriat hlawh ber ber - Tluangpuii Hmar, Sangboihi, Christine V, Rempuii Hmar, Rini Hlondo leh Escape Engmawia te kutchhuak mawi tak tak hmuh tur a awm dawn a ni.

Tluangpui Hmar
Kuminah hian zaithiam eng emaw zatin Tluangpui Hmar kutchhuak an inbel dawn a, chung zingah chuan Cindy Lalthanpuii leh Omomi Khiangte te pawh an tel. Anni bakah hian model - Nunui Sailo, Emily Chenkual leh Phirthangi te pawhin Tluangpui Hmar kutchhuak an inbel dawn a ni.

Rini Hlondo
Rini Hlondo hi Mizo designer zingah chuan hriat hlawh ber te zinga mi a ni a, milar tam takin a kutchhuak an lo inbel tawh a ni. Tun ṭum Ṭhazual Award-ah pawh hian - Vari Varte, Rody H Vanlalhriatpuii, Leni Ralte, Eli Khiangte leh Chhuangi te chuan a kutchhuak an inbel leh dawn a, hmuh chakawm tawh tak a ni.

Escape Engmawia
Mizo mipa zingah designer lar tia sawi tur an tam lo a, a awm chhun te erawh an chhuanawm hle. Chung zinga sawi hmaih thei miah loh chu Escape Engmawia a ni a, a ni hian Ṭhazual Award-ah kutchhuak phochhuahna hun remchang a nei dawn. Feli Fanai, Rachel, Jaui leh Marina-i te chuan a kutchhuak an inbel dawn a, Sawmsawmi, Sawmtea leh Mizo Idol star Ticos-a te pawhin Escape Engmawia kutachhuak an ha dawn bawk a ni.

Miss Mizoram 2018 T. Ram­than­mawii (Thanthani) chuan Sangboihi kutchhuak a inbel dawn a, Moitei Ralte leh C. Lallawm­zuali ten Christine V design an ha thung dawn. Stacy leh Sawmtei ten Rempuii Hmar kutchhuak an mawipui dawn em tih chu hriat a ni thuai dawn a, Pearl - Mahlui pawhin a mawi thei ang berin model Nunu Rualhleng thuam a tum dawn bawk.

Miriam Khiangte leh Esther Sailo te chuan chuan Teremi Ralte leh Mawimawi-Moda te design an inbel dawn a, Sangkimi Khiangte pawhin Rpi Varte (Varte Creation) kutchhuak a ha dawn bawk.

Heng bakah hian Achhani Innovative Dresses, Mapuii Hlondo, Ruthi Ahmangaihi, Afaki Hauhnar, Anuni Pachuau, Modern Suiting, Manuntei Sailo leh Hannah Khiangte te kutchhuak hmuh tur a awm dawn bawk a ni.