Vawiin aṭangin Pawl Kut Exibition

Mizoten kut kan neih hrang hrang zinga pakhat Pawl Kut chu December 19 hian Lammual-ah neih a ni dawn a, inbuatsaihna pawhin a vawrtawp a thleng dawn hnai ta.

Kut denchhen hian vawiin aṭangin Elec­tric Veng YMA Hall-ah Handloom and Handi­crafts Exhibition buatsaih a ni dawn a, Mizo kutchhuak thil chi hrang hrang tlawm tak taka lei tur a awm dawn a ni. Vawiin aṭang vek hian Vanapa Hall-ah Photo Exhibition buatsaih a ni dawn a, photography lama tui mite tan hmaih chi rual a ni lo. Thlalak nalh leh ṭha phochhuah a ni dawn a, a duh tan lei nghal theih a ni.

Pawl Kut-ah hian ri­mawi ngainatute tan pawh hun duhawm a inherchhuak dawn a, India band lar Parikrama leh foreign band Guns 2 Roses te pawh an inlan dawn a ni. Anni bakah hian T Melody band te an che dawn bawk a, Zonun band leh The Scavenger Project te an la awm cheu bawk.

Pawl Kut-ah hian mipa leh hmeichhia tan Best Traditional Dress thlanna a awm dawn a, lawmman pawh ṭha tak siam a ni dawn. Hei hi naupang leh puitling tan a ni ang.