Miss Universe 2018 ; Philippines nula Catriona Elisa Gray

Khawvel ram hrang hrang 94 aṭanga nula ṭha ber ber fuankhawm zingah, Philippines nula Catriona Elisa Gray chhing zo an awm lo va, Miss Universe 2018 atan thlan a ni. Kum 24 mi Elisa Gray hi Miss Universe 2017, Demi Leigh Nel-Peters chuan crow a khum tir a, lawm avangin a hnuk a ulh hial.

South Africa aiawhtu Tamaryn Green chu first runner up a ni a, second runner up chu Venezuela nula Sthefany Guterrez a ni. Hetih lai hian India aiawhtu Mumbai nula Nehal Chudasama chu top 20-ah a inhlangkai zo lo va, India beiseina a tham ral leh ta a ni.

Miss Universe atana thlan thar Elisa Gray hian Grand Finale-ah zawhna a chhang ṭha hle a, a champion pui ta a ni. A tawn hriat tawh aṭanga a thil ngaihpawimawh ber leh Miss Universe atan thlan ni ta se engtianga hmalak nge a tum tih an zawt a ni.

Elisa chuan, "Manali-a mirethei te khawsakna hmuna hnathawk ṭhin ka ni a, khawsak a hniamin a harsa tak zet a ni. Chu hmun harsa takah chuan mawina hmuh tumin keimah leh keimah ka infuih fo ṭhin a, naupang rethei tak tak te hmelah chuan mawina ka zawng ṭhin. Chu hmunah ngei chuan tih tur tam tak ka la nei a, an tan ka bei zel dawn a ni," tiin a chhang a ni.

Miss Universe vawi 67-na hi Muang Thong Thani, Thailand-ah neih a ni a, American comedian Steve Harvey leh supermodel Ashley Graham te chuan an host a ni. Kuminah hian contestant 94 zet an tel a, an tam ber ṭum a ni. Kum 2017 khan contestant 92 an tel a, hei hi an khum ta a ni.

Catriona Elisa Magnayon Gray hi January 6, kum 1994 khan Cairns, Queensland, Aus­tralia-ah a piang a, Oas, Albay, Philip­pines-ah an khawsa thung. A pa Ian Gray chu Australian niin, a nu Normita Ragas Magnayon hi Filipino a ni thung. Australia leh Philippines khua leh tui nihna a nei kawp a, Miss Universe thlanna-ah hian Philippines aiawhin a tel a, Filipino zinga Miss Universe title la thei palina a ni ta a ni.

Amah hi feet 5'10 zeta sang niin, model a nih bakah hian - singer, television host leh stage actress a ni tel bawk. Arts lamah a tui hle a, music lamah pawh master certificate nei ngat a ni. Love Yourself PH-ah HIV/AIDS advocate niin, Young Focus NGO-ah volunteer-in a thawk ṭhin bawk. Hei mai hi a la ni lo a, martial arts lamah pawh black belt ngat a ni.

Kum 2016 khan Miss World Philippines atan thlan a ni a, hemi ṭum hian sub-title pali a hui nghe nghe. Hemi kum vek hian Miss World thlannaah an ram ai a awh zui a, top 5-ah a lang phak a ni. Heng bakah hian Miss thlana hrang hrangah title eng emaw zat a lo la tawh bawk a ni.

Binibining Pilipinas 2018 atan thlan a nih hnuah Miss Universe 2018-ah a inlan zui a, title hlu tak a hlawh­chhuak leh ta a ni. Miss Universe-ah hian sub-title pali - Best Swim­suit, Best Evening Gown, Best Fashion Run­way leh Best Talent te a hui bawk.