Ticos-a live concert A hun a thleng dawn ta

Zaithiam tam takin live concert an neih ngam tawh loh laiin, Mizo Idol star Ticos Darhmingliana chuan zanin hian Vanapa Hall-ah live concert a nei riap dawn.

Programme hi zan dar 7-ah ṭan a ni dawn a, live music ngaina tan chuan tel ngeina tur chi a ni. Ticos-a hian a hla thulkhung eng emaw zat a phawrh dawn a, Mizo Idol intihsiakna neih laia a hla sak lar tawhte a sa dawn bawk. A hla sak tur zingah hian - Hmangaihna Rinawm, Ka Phallo Che, Jerusha tihte, Hmangaihna leh Lungmawi Duhsam tihte pawh a a tel a, live music vek tur a nih avangin chhim man hla tur tak a ni.

Ticos-a chuan a concert neih tur chungchang sawiin, "Idol intihsiakna neih a nih lai khan duhthusamin lawmthu sawina hun kan nei lo a, hun ṭha a inher chhuak dawn ta a ni. Ka zai min lo ngaihhlut saktute tana lawmthu sawina leh Krismas thilpek hlanna ni pahfawmin hun himawm tak kan hmangho dawn nia," tiin, a concert chhim turin mipui a sawm.

He concert-ah hian Ticos-a bakah - Tommy L Pachuau leh Henry Thanzauva te a inlan dawn a, LPS On Stage-a special guest ni phak ngat, Zuangtui tleirawl Notei pawhin a inlan dawn bawk. Hei mai hi a la ni lo va - Mizo Idol-a Ticos-a telpui Jonathana leh Teawmi te an la inlan dawn cheu bawk.

Bacardi Experiences presents Ticos Live Concert hi a duh apiang tan chhim theih a ni a, ticket hi Rs. 100, 200 leh 500 man te a ni. Dawr hrang hrangah lei theih a ni a, a hmunah lei tur a awm dawn bawk.