Hontrade International Ṭhazual Fakna ; Jennie Lalruatfeli a thiam ber

'Thuneihna I ta' tih hla thiam taka satu Jennie Lalruatfeli chuan Hontrade International Ṭhazual Fakna chart-ah No.1 a luah a, pahnihna chu Kolasib nula Grace Lalchhanhimi a ni.

Henry Varte chu a hla thar nen top 3-ah a lang a, Hlimhlimi leh Stacy V.L. Muanpuii te chu top 5-ah an lang bawk.

Ṭhazual Award nominee
Tun ṭum chart-a dinhmun sang ber luahtu Jennie Lalruatfeli hi December 20-a sem tur Ṭhazual Award 2018-ah Best New Artist (Gospel) nominee a ni a, chart-ah No.1 a hauh pawh hi a inhmeh hle. Tunlai zaithiam chhuak thar zingah chuan hriat hlawh chho ber te zinga mi a ni a, a hla pawhin thlan a hlawh hle a ni.

Kulikawn nula Jennie hian September thla khan 'Thuneihna i ta' tih hla hi a tichhuak a, tun­lai fakna hlan thlan hlawh ber a ni mek. He hla hi Amtea Chhakchhuak lehlin niin, a thluk pawh a mawi danglam hle. Video hi Andrew Lalbiaknunga siam sak a ni a, recording hi Kings and Prophets kutchhuak a ni.

Jennie Lalruatfeli hian 'Ka thinlung Lawmna' tih hla hmangin Ṭhazual chart-ah ṭum hnih No.1 a lo hauh tawh a, 'Thuneihna i ta' tih hla hmangin a dinhmun ngaiah a rawn inhlangkai leh ta a ni.

Teawmi'n hma a sawn
Mizo Idol aṭanga Zoram mipuiin kan hmelhriat Immanuel Lalawmpuii (Teawmi) chuan chart-ah pasarihna a hauh a, zawi zawin hma a sawn zel. Teawmi hian a vawi khat nan tun hnai khan music video a tichhuak a, thlan hlawh ber te zingah a tel nghal.

A music video hi 'Hlimin I zai ang' ang tih a ni a, Lalngaihawma Hnamte (Angaiha) phuah a ni. Krismas hla ṭha tak niin, belchian pawh a dawl hle. He hla-ah hian Alive Project Band leh Vaivakawn CO Bial Songters ten an pui a ni. Video hi In House Production kutchhuak a ni bawk.

Tun ṭum chart-ah hian Ṭha­zual Award dawng thei tura chawp­chhuah zinga mi Sawmtea chu top 10-ah a lang a, Mizo Idol star Malsawmdawngkimi leh Seraphic Choir te hmel hmuh tur a awm bawk.

Hontrade International Ṭhazual Fakna Top 10
1. Jennie Lalruatfeli - Thuneihna I ta
2. Grace Lalchhanhimi - Rinna mitin ka thlir thin
3. Henry Varte - A sawm che
4. Hlimhlimi - Min pui ang che
5. Stacy V.L. Muanpuii - Thlen ka nghakhlel
6. R. Lalrinmawii - I hlan ang u
7. Teawmi - Hlimin I zai ang
8. Sawmtea - Ka awin Pathian chu ka auva
9. Malsawmdawngkimi - A hnen pan la
10. Seraphic Choir - Chibai I buk ang