June ni __-ah BTS-in album thar tlangzarh dawn

Ṭhalai rualin an atchilh rawn South Korean group Bangtan Boys chuan Pathianni khan album thar an tlangzarh hun tur an puangzar a, June 10-ah an tlangzarh dawn.

BTS hian an album thar tlangzarh hun tur hi social media kaltlangin an puangzar a, tagline 'We Are Bulletproof' tih tarlang tel a, chubak chu thuchiang engmah hriat tur dang a la awm lo. Tun dinhmunah an album thar tur hi englam hawi nge tih a la hriat loh a, 'We Are Bulletproof' tih hi an album thar tur title nge a nih a, hla hming nge a nih a, tagline satliah tih pawh tu hriat va ni suh.

“Permission to Dance On Stage – Las Vegas” residency show an neih tawp zanah Jin, Suga, J-Hope, RM, Jimin, V leh Jungkook-te chuan teaser video tichhuakin, member tin clip black-and-white hmuh tur a awm a, chutah chuan 'We Are Bulletproof' tih a rualin a tawpah an sawi a, 2022.06.10 tih hmuh tur a awm nghal. Billboard chuan 'We Are Bulletproof' hi an era thar tura slogan nia a lan thu an ziak a, album thar tur title chu an la puangzar leh dawn niin an sawi thung.

Pathianni khan BTS’ label Big Hit Music khan Weverse-ah thla hnih hnuah BTS-in album thar an tihchhuah dawn thu hi puangzarin an tichiang ta a ni.

November 2020 khan BTS hian an album hnuhnung ber, Billboard 200 chart lamah pawh topper an nihpui 'Be' an tichhuak a, chumi hnuah chuan album an la tichhuak leh lo. Single hit tak tak 'Butter' leh 'Permission to Dance'-te tichhuak leh tawh mah se album erawh an la tichhuak leh lo a ni.

BTS hian kar hnih liam ta chhung khan NFL Raiders home Las Vegas Allegiant Stadium-ah vawi li lai concert an nei a, chhimtu an ṭhahnem ṭhin hle.