MT-15 V2 Mizoramah hralh chhuak ṭan

Thansanga and Sons Auto Division, Ramhlun North, Aizawl chuan nimin aṭang khan ṭhalaite bike ngainat MT-15 Version 2 chu an hralh chhuak ṭan.

MT-15 V2 hi an showroom changkang zawk leh mawi zawka an duan a, 'Blue Square showroom' an tih hnua an bike hralh hmasak ber niin mi 93 laiin hauh lawk mah se semiconductor (chip) harsatna avangin Mizorama Yamaha two-wheeler dealer hian 20 chauh an dawng a, an duh angin an hralh chhuak chak thei lo.

Mt-15 version hmasa kha March 23, 2019-ah Mizoramah zawrh chhuah ṭan niin India rama Yamaha two-wheeler dealer zingah Thansanga and Sons Auto Division hi MT-15 V1 hralh tam ber an ni.

Tuna chhuak thar hi a pianhmang leh ruangamah version hmasa nen khan a danglam tam lo a, mahse an rawn thuam ṭha viau thung. USD fork a hman bakah swing arm thar, bluetooth leh speedo metre thar a hmang a, rawng chi thar pahnih a awm belh bawk.

Thansanga and Sons Auto Division neitu Robert Lalremruata chuan kum hnih kal ta aṭangin chip lam harsatna avangin bike an dawng ṭha lo tih sawiin, lei duh tan pawh nghah rei a ngai ṭhin tih a sawi. "Nikum aṭang phei kha chuan lirthei chhuak thar kan tlangzarh ngam tawh lo a, a chhan chu kan duh ang kan lak theih loh avangin lei duhte hnenah kan pe thei lo a, a hrehawm hle a ni," a ti.

MT-15 V2 Mizoram price (on-road):-
MT-15 V2 blue/Cyan/Grey
- Rs 1,81,461
MT-15 V2 metallic black
- Rs 1,80,421