Forbes Highest-Paid Model 2018 ; Kendall Jenner a hlawh hnem ber
Khawvel huapa magazine lar Forbes chuan Forbes Highest-Paid Model 2018 a tichhuak a, American model lar Kendall Jenner chu kum khat chhunga hlawh hnem ber a ni.
'Keeping Up with the Kardashians' star hian kum khat chhungin $mtd 22.5 zet a hlawh chhuak a, Karlie Kloss leh Chrissy Teigen te chuan an dawt a ni.
Kendall a ropui
Supermodel zinga thawm nei lian ber tih ngam Kendall Jenner hi kum 23 mi lek a la ni a, a sulhnu erawh a namai lo hle. Kum naupangte ni chungin modelling lamah a hming a chher a, tunah chuan khawvela model hlawh hnem ber a ni der tawh.
Nikkum June aṭanga kumin June thla chhung khan $mtd 22.5 zet a hlawhchhuak a, amah hnaih bertu American model Karlie Kloss chuan $mtd 13 a hlawh a, an sum lakluh a inthlau hle. Kendall Jenner hi Victoria Secret model niin, tunlai model zingah chuan hriat hlawh leh lawm hlawh ber te zinga mi a ni.
American an langsar
Kum khat chhunga model hlawh hnem zual zingah hian American an tam ber a, top 10-ah mi paruk ngawt an lang a ni. Top 3 - Kendall, Karlie Kloss leh Chrissy Teigen te hi American vek an ni a, an sum lakluh pawh a turu rem rem hle. Karlie Kloss hian kum khat chhungin $mtd 13 a hlawh a, Chrissy Teigen pawhin $11.5 lai a hlawhchhuak bawk.
Anni bakah hian tunlai model zinga 'hot' ber pawl Gigi Hadid leh Bella Hadid te chuan $mtd 9.5 leh $mtd 8.5 lalutin pasarihna leh pariatna an hauh a ni. Joan Smalls pawhin kum khat chhungin $mtd 8.5 zet lalutin top 10-ah a inhlangkai bawk.
Hetih lai hian English model Rosie Huntington-Whitely chu palina a ni a, Brazillian model lar chuai thei lo Gisele Bundchen chu panga-na a ni. Kum 38 mi Bundchen hian kum khatah $mtd 10.1 zet a la hlawhchhuak a ni.
English model dang Cara Delevingne chuan $mtd 10 lalutin parukna a hauh a, Dutch super model Doutzen Kroes chu top 10-ah a lang bawk.
Forbes Highest-Paid Model list hi model ten show aṭanga an lakluh bakah, sponsorship leh thil danga an lakluh aṭanga siam a ni.
Forbes Highest-Paid Model 2018 Top 10
1. Kendall Jenner (American) : $mtd 22.5
2. Karlie Kloss (American) : $mtd 13
3. Chrissy Teigen (American) : $11.5
4. Rosie Huntington-Whitely (British) : $mtd 11.4
5. Gisele Bundchen (Brazilian) : $mtd 10.1
6. Cara Delevingne (British) : $mtd 10
7. Gigi Hadid (American) : $mtd 9.5
8. Bella Hadid (American) : $mtd 8.6
9. Joan Smalls (American) : $8.5
10. Doutzen Kroes (Dutch) : $mtd 8