Vawiinah Pawl Kut hmang dawn

Vawiin hian Lam­mual-ah Pawl Kut hman a ni dawn a, a duh a piang tan chhim theih a ni. Chawhma lamah naupang pualin hun hman a ni ang a, chawhnu lamah intihhlimna hrang hrang a awm zui dawn bawk.

Rimawi ngaithlak tur a awm dawn a, Mizo zaithiam - Lalruatpuii, Israel Lalbiakrema, Fel Fanai, Tribal Power vocalist OP-a, DJ Lalvenhimi leh Mizo Idol Jerry Lalrinawma te an perform dawn. Anni bakah hian Scavenger Project leh T Melody te an la awm cheu bawk.

Mipui tana thu lawm­awm tak chu - Indian band hlun Parikrama leh foreign band Guns 2 Roses te inlan tur hi a ni. Parikrama te hian Aizawl an lo thleng tawh a, stage-a duh tawka an che vel en duh chuan Lammaul pan mai tur a ni.

Nikum lamah pawh Aizawla show rawn nei tawh Guns 2 Roses te chuan a vawi hnih nan Aizawl-ah show an nei leh dawn a, hmaih phal chi a ni lo bawk.

Pawl Kut-ah hian Chhawng­hnawh, rallu lam, tlanglam, siktui­thiang lam, pawn to leh sarlamkai te a awm dawn. Pawl Kut hi naupang pual a nih ang ngeiin Best Traditional Dress thlan a ni dawn a, top 10 chin tan lawmman siam a ni ang. Puitling tan pawh buatsaih a ni dawn bawk a, top 5 chin a ni thung ang.