Ṭhazual Award 2018 bihchianna

Zo rimawi khawvela award ngaihhlut hlawh ber te zinga mi Ṭhazual Award chu December 20, Ningani zan hian Dawrpui Multipurpose Hall-ah sem a ni leh dawn ta a, chawimawina dawng tur chawpchhuahte pawh an hrawl hle.

Kuminah aṭang hian Best Songwriter category a awm thar dawn a, a vaiin cate­gory 10 a awm tawh dawn a ni. Category tinah hian nominee panga zel awmin, category pakhat aia tama lang mi eng emaw zat an awm bawk.

Ngaihnawm tur zual

Ṭhazual Award 2018-ah hian category ngaihnawm tur tak tak a awm nual dawn a, a bikin New Artist dawng thei tura chawp­chhuah ten ngaihven an hlawh zual hle.

Lengzem lamah chuan 'Jerusha' tih hla thiam taka satu David Lalremruata te, Ṭhazual chart-a mikhual lo tak HT Lalthanzami bakah, KR Robert, Ramzauvi leh Jenny Jathang te chhawpchhuah an ni.

David Lalremruata hi 'Jerusha' larpui thei a nih avangin dahhniam chi rual a ni lo va, HT Lalthanzami lah tunlai lengzem singer zingah chuan hla nei ṭha thei ber te zinga mi a ni. KR Robert, Ramzauvi leh Jenny Jathang te sawi hmaih chi an ni lo va, an sulhnu enin award dawng awm tak tak vek an ni.

Gospel lama hming chawpchhuah te hi Jennie Lalruatfeli Ralte, Lalhmangaihzuali (Nunui), R. Lalrinmawii, Felfeli Ralte leh Lalnunpuii Kawlni te an ni a, Best New Artist atan thlan awm tak tak vek an ni.

Kulikawn nula Jennie Lalruatfeli hi tunlai zaithiam zingah chuan 'ṭhangduang ber' te zinga mi a ni a, Ṭhazual chart-ah dinhmun sangber luah mektu a ni. Nunui-i'n 'Min kian sah suh' tih hla hmangin Zoram mipui min awitlei a, a thiam zia inhrilh nawn a ngai lo.

Praise On-a pakhatna ni thei Arini hi chawimawina dawn phu ber te zinga mi a ni bawk a, Felfeli Ralte leh Lalnunpuii Kawlni te an la awm cheu bawk avangin, award dawng tur pawh rinthiam a har hle.

Best Artist lam hi Award ngaihlut ber te zinga mi a ni a, nominee te pawh Zoram dung leh vanga hriat hlawh tak tak an ni. Lengzem huangah chuan mipa lamah - Manuna, Mathlenga, Kimkima, Thiamchantira leh Henry Lalmalsawma Renthlei te hming a lang a, kumlama naupang ber Kimkima chu mipui mitfukna a ni. Kimkima hian 'Sarah, I zunzam' tih hla hmangin hlawhtlina ropui tak tak a lo chang tawh a, tun hnaiah hla thar hit tak mai ati chhuak leh tawh bawk. A hla thar hi 'I zun ngaih lunglen vangin' tih a ni a, tunlai lengzem singer zingah chuan thawm nei lian ber tih ngam a ni.

Hmeichhe lamah 'top artist' huanga mi Zorinzuali, DJ Lalvenhimi, Feli Fanai, Rachel Lalnunkimi leh Josephine Lalawmpuii te an lang a, tu mai pawh hi awm tak vek an ni. Zorini leh DJ-i te hi tunlai zaithiam zingah chuan thawm nei lian leh sawm hlawh ber te zinga mi an ni a, award dawng zingah an tel a nih pawhin a mak lo vang.

Hetih lai hian Feli Fanai leh Rachel-i te an la awm cheu avangin a awlsam dawn lo. Anni pahnih hi tunlai lengzem singer-ah chuan 'hot' ber tih ngam an ni a, an music video pawhin belhchian a dawl ṭhin hle. An sulhnu leh Ṭhazual chart aṭanga kan thlir a nih chuan Josephine Lalawmpuii hi award dawng tura khan ber te zinga mi a tih loh theih loh bawk.

Gospel lamah chuan - Amtea, Zorin­sanga, Thawhlehnaniropuia, Bka leh nikkuma he chawimawihna lo dawng tawh Sawmtea te chu Best Artist award dawng thei tura chawpchhuah an ni. Tu mai pawh hi buk rit tak vek an ni a, result puan a ngawhhlehawm hle.

Grace Lalchhanhimi, Mawitei Ralte, Ruthi CVL Muanpuii, Hlimhlimi leh Stacy VL Muanpuii te chu Best Female Artist nominee te an ni a, a ngaihnawm dawn. Ruthi CVL Muanpuii hi Ṭhazual Award bikah chuan mithar a ni a, chutih rual chuan chawimawina dawng tura khan ber a ni lawi si. Chutih rual chuan Hlimhlim leh Grace Lalchhanhimi te an awm tih hriat a ṭha a, Mawitei leh Stacy te sawi hmaih chi an ni lo bawk.

Best Music Video chu mipui ngaihven ber pakhat a ni bawk a, Lengzem lamah chuan Sangkimi Khiangte, David Lalremruata, DJ-i leh Rachel Lalnunkimi te an lang a, PUC hming a lang bawk. Gospel bikah chuan - Amtea, Henry Varte, Zorinsanga, Jennie Lalruatfeli leh Valtea-te an lang a ni.

Hun ṭha a her chuak ta

Zaimi ten hriat an hlawh em em laiin hlaphuah thiam ten ngaihven an hlawh tawk lo ṭhin a, kuminah erawh an tan hun ṭha a her chhuak ta. Tunlai hla phuah thiam zinga hriat hlawh tak tak - Myztic Sailo, Dina Jathang, Parpuii Chawngthu, Kima Chhangte leh Faith Lalduatmawii te chu Best Songwriter award dawng thei tura chawpchhuah an ni a, result hriat a chakawm tawh hle.

An sulhnu en chuan chawimawina dawn phu tak tak vek an ni a, amaherawhchu mipakhat tan chauh a nih avangin a hlu zual dawn a ni.