Russia-ah rap music khuahkhirh dawn

Russia president Vladimir Putin chuan an ramah rap music khuahkhirh a nih tur thu a puang. Hetih lai hian khap bur erawh a ni dawn lo tih a sawi a, kaihruainna mumal tak hnuiah a awm dawn a ni, a ti.

Hemi chungchang hi December 15 khan ngaihtuah a ni a, Vladimir Putin chuan an thutlukna hi apuang chhuak ta a ni. Pitin chuan, "Kan rama ṭhalai tam takin music an ngaina hle a, hei hian nghawng ṭha lo tak a nei mek ani. Kan khap bur thei a nih si loh chuan kawngdang kan dap a ngai a, khuahkhirhna mumal tak siam a ngai ta a ni," tiin a sawi.

Russia president hian rap music chuan thil ṭha lo tak tak pathum - sex, drugs leh protest te a kengtel niin a sawi a, chu chuan ṭhalai tam tak te nunah nghawng ṭha lo a nei mek a ni, a tibawk.

Russia-ah hian rapper ten nekchepna an tawk mek a, November thla pawh khan Husky chu a concert neih lai tihtawp sak a ni. Kum 25 Husky hi a hla thu a bawlh hlawh hle niin an sawi a, police ten an man zui bawk a ni. Russian rapper GONE.Fludd chuan concert a neih tur ṭum hnih chu a lo ṭhulh tawh bawk.