Ṭhazual Award 2018 Ropui takin sem a ni ta ; Best Male Artist Lengzem Kimkima

Zonet chhungkua leh Music Domain Mizoram (MDM) ṭangkawpten an buatsaih Ṭhazual Award 2018 chu Ningani zan khan Dawrpui Multipurpose Hall-ah ropui taka sem niin, Kimkima kutah Best Male Artist Lengzem award hlan a ni. Hmeichhe lamah chuan Rachel Lalnunkimi'n he chawimawina hi a dawng.

Gospel lamah chuan Amtea leh Stacy VL Muanpuii-te an ropui a, award ngaihlut Best Male Artist leh Best Female Artist-te an la a ni. Durtlang nula R. Lalrinmawii (Arini) chu Best New Artist Gospel atan thlan a ni a, Lengzem lamah 'Jerusha' hitmaker David Lalremruata chu Best New Artist atan thlan a ni.

Zorinsanga Sailo chuan a music video hit tak mai 'Min hual reng ṭhin' hmangin Best Music Video Gospel a la a, Best Music Video Lengzem latu chu DJ Lalvenhimi a ni. Myztic Sailo chuan Best Songwriter award hmasa ber a humhaw a, Durtlang Leitan Band, Euphony chu Best Dio/Group atan thlan an ni bawk.

Hei le Kimkima chu!
Tunlai lengzem singer zingah 'tunge ṭha ber' tiin inzawt ila, mi tam zawk chhanna chu Kimkima a ni ngei ang. Hei hi a dik a ni tih hai rual a ni lo va, tuma thik rual lohin Best Male Artist atan thlan a ni.

Kimkima hian 'Sarah, I zun­zam' tih hla hmangin Zoram mipui min lo awi tlei tawh a, tun hnaiah khan 'I zun ngaih lunglen vangin' tih hla a rawn chawpchhuak leh bawk. He hla ngei mai hi award semna-ah hian a sa a, mipui thawm a ring ṭha kher mai. A zai ngainatu an tam tak zet tih a lang a, mipui ngaitnat rawn a ni.

Kimkima hian award a dawn hian a nu chu stage-ah kochhuakin, tun hun a thlen theih nana kaihruaitu a nu chu chhuang takin a kuah. Lawm avangin a insum zo lo hial a, a biangah mittui a luang a ni.

Kimkima hian hun harsa a tawh laia a mah fuih a, ṭawngtai sak ṭhintu a nu a chawimawi let avang hian fak a hlawh hle a, entu mipui zingah pawh mahni ṭhut hmuna lo insut faih faih an awm nual!

Stacy a inlar
'Tunge' tih hla hnehsawh taka a sak avanga a hming dai tawh lo tur, Stacy VL Muanpuii hi tunlai zaithiam tam tak tluk loh a la ni. Kuminah album tichhuakin rimawi lamah nasa zawkin a rawn inhmang leh a, a thiam ngaiin a la thiam reng.

Ṭhazual Award sem zan hian Stacy hi ṭha takin a perform a, award hlu tak a hum haw bawk. Lamthiam eng emaw zatin an ṭawiawm a, stage-a a che vel hian mit a tlung tak zet a ni. Best Female Artist Gospel award hlan a ni a, a lo ropui tawh ṭhinna rimawi khawvelah rahbi thar a rawn tuk leh ta a ni.

Feli Fanai a che pui
Nikum khan a lo perform tawh a, mit a tlung hle a nih kha. Kuminah pawh Feli Fai bawkin Ṭhazual Award 2018 a khuhhawng a, a chepui leh rem rem hle.

A hla thar 'Tuman an tluk lo' tih hla a sa a, Mizo Dance Camp (MDC)-ten an pui bawk. Music rema lam vel pawh a hnehsawh hle a, tunlai zaithiam lar zingah chuan a ni aia thlanawm an awm chuang lo.

Kulikawn nula Nunui leh Jennie Ralte-te an che bawn hle bawk a, an che vel a hmuhnawm tak zet. An per­form tihmuhnawm zual turin lamthiam ten an ṭawiawm a, show tihlawhtlingtu satliah mai a ni lo tih a chiang hle.

Zauvi perform mawlh kha a ni show tiropuitu chu! Lam­thiam rualte nen stage-ah an rawn penchhuak a, mipui beisei phak baka ṭhain an che. A zai ṭhat bakah a perform a hmuh­nawm tak zet a ni.

Ṭhazual Award 2017, Best Male Artist Gospel award latu Sawmtea'n mipui a chawkphur hle bawk a, stage-a a che vel a hmuhnawm tak zet. A ni pawh hi MDC lamin an ṭawiawm ṭha hle a, entu mipui mit an tlung hle. Ruth CVL Muanpui sawihmaih theih a ni lo bawk a, Nunui Chhangte a che ṭha viau bawk.

Marina Varte chuan show a khar thung a, a ni pawh Mizo hnam lamte nen beiin a che bawn hle a ni.

Mizo Idol an vul
Ṭhazual Award show tihlutu zinga sawi hmaih hauh loh tur chu Mizo Idol star-te an ni. Jerry Lalrinawma chuan C. Sanga pualin 'Ka hmangaih reng che' tih hla a sa a, mipui rilru a khawih hle.

Tleirawlte star rawn Ticos-a'n a hla thulkhung a sa a, Champhai nula Mami a zai ṭha leh pek hle bawk. Teawmi a che hot leh pek viau bawk a, stage a luahlum ṭha tak zet a ni.

Show hmuhnawm bik
Ṭhazual Award hi kawng tin rengah a changtlung tak zet a, zaithiamte tan chuan a hlu leh zual ngei ang. Delta Sound-ten an hmanraw neih ṭhat ber ber an chawpchhuak a, stage pawh uluk taka chei a ni. Engkim ruahmanna fel tak hnuaiah kalpui a nih avangin show hmuhnawm bik tih loh rual a ni lo.

Rini Hlondo chuan show hi hnehsawh takin a host a, a talent neih ṭhatzia hai rual a ni lo. Ṭhazual Award 2018 a hlawhtlin theih nana 'sawmbik'-te an kalṭha hle a, model leh infiamna hlawhtling bakah, kawng hrang hranga mi chhuanawm tak tak an kat nuk a ni. Mizo Dance Camp te chu show tihhlawhtingtu tih loh phal rual an ni lo.

Award hlantu zingah Mami Varte a tel bawk.