Fantastic Beast 3 US-ah Beisei angin a 'fantastic' lo

'Fantastic Beasts: The Secrets of Dumbledore' chu ram eng emaw zatah tlangzarh a nih hnuah Zirtawpni liam ta khan US-ah tlangzarh a ni ve ta a, ram dangah che ṭha viau mah se beisei ang erawh chuan US lamah a che ṭha lutuk lo.

Kar tawp liamta chhung khan 'Fantastic Beasts: The Secrets of Dumbledore' hi theatre 4,208-ah chhuah niin $42,151,256 a lalut a, Harry Potter Franchise-a North America-a tlangzarh kara sum lalut tlem ber a ni. Hetih lai hian ram dangah erawh a che ṭha tho a, $150,700,000 lai US pawn lam aṭanga a lakluh tawh avangin a sum lakluh tawh zawng zawng zat chu $192,851,256 lai a ni tawh tho.

Eddie Redmayne, Jude Law, Ezra Miller, Dan Fogler, Alison Sudol, Callum Turner, Jessica Williams, Katherine Waterston, leh Mads Mikkelsen-te channa film hi $mtd 200 vel senga an siam a ni a, a film hmasa pahnih a chet ṭhat miau avangin beisei a sang a, beisei a pha lo deuh tih a ni mai a, an budget hi chu an hmu chhuak thuai dawn tih a chiang viau tho mai.

Critics-te'n eng nge an sawi?
Fantastic Beast film hmasaa Grindelwald lema chang Johnny Depp aiawhtu Mikkelsen an fak viau hlawm a, ṭhenkhat chuan Depp aiin a che ṭha zawk niin an sawi hial. A film chungchangah erawh film review-tute ngaihdan a inchen lo viau a, sawiseltu an tamin rating pawh a hmu ṭha lutuk lo.

Rotten Tomatoes-ah mi 183-in an review aṭangin rating 5.5/10 a hmu a ni.

Film thar dang
Biographical drama film, Mark Wahlberg, Jacki Weaver leh Mel Gibson-te channa 'Father Stu' chu pangana a ni. Theatre 2,705-ah chhuah niin $5,402,642 a lalut. He film hi Father Stuart Long, boxer aṭanga Catholic puithiama inlet ta chanchin a ni a, Mark Wahlberg hi Father Stuart Long lemah a chang a ni.

'K.G.F: Chapter 2' chu pakuana niin film thar zinga top 10-a lang thei a ni bawk a, movie lam tuipui film thar ngaihven hrim hrimte tan- Dual(14), Paris, 13th District (19), We're All Going to the World's Fair (23) leh The Tale of King Crab (29)-te chu film thar chart-a lang an ni bawk.

Box Office Top 10:-
1 Fantastic Beasts: The Secrets of Dumbledore $42,151,256
2 Sonic the Hedgehog 2 $29,304,395
3 The Lost City $6,222,777
4 Everything Everywhere All at Once $6,187,118
5 Father Stu $5,402,642
6 Morbius $4,730,148
7 Ambulance $4,067,245
8 The Batman $3,767,652
9 K.G.F: Chapter 2 $2,874,000
10 Uncharted $1,191,034