Zorinzuali; hla thar nen a lo kir dawn e

Zorinzuali kan hria. A zai thiam a, Zofate zingah a zai ngainatu an tam tih pawh kan hria. Mahse hun eng emaw chen hla thar a tichhuak tawh lo.

Tunah erawh a zai ngainatute tan thu lawmawm hriat tur a awm. Hun eng emaw chen hla thar a tihchhuah tawh loh hnuah hla thar 'Lungher lo la' tih nen rimawi khawvelah a lo kir dawn a, music video pawh a peihfel tawh.

'Lungher lo la' tih hla hi a mawi ngei ang tih a rinawm. A chhan chu lengzem hla ṭha tak tak lo phuah tawhtu John Mawitea leh Mapuii Fanai-te hla a ni tlat! A mawi lo thiang lo.

Music chu Tka Sailo kut chhuak a ni a, recording leh backing vocal chu Ronald Zothantluanga (3 Bro-sis) buaipui ni thungin tunah hian MDM Library lamah a dahlut fel tawh. Hun rei lote hnuah Zonet leh YouTube lamah kan hmu thuai dawn.

EDM Synthpop lam hawi a ni dawn a, helam ngainatute tan phei chuan ngaihthlak manhla tak a ni ngei ang.