Entertainment khawvela thil thleng langsar

Kum 2016 kan hmang liam a, entertainment khaw­velah chuan thil thleng tam tak a awm a, chung zingah chuan thin ti ṭhawng leh mi barakhaih tak tak pawh a awm nual. Krismas lai vela British zaithiam lar, Krismas a thlen tawha khawvelin a hla a ngaihthlak ngei ngei George Michael kan chân. Khangte khan khawvel a ṭhawng a, mahse tuna kan tarlan tur bik hi chu US chhunga thleng a ni.

Tarlan hmasak loh theih loh chu Taylor Swift leh Calvin Harris te inṭhen thu hi a ni. An inngaizawng rei ve hman phian a, an inṭhen chiah tihin Taylor Swift hi Tom Hiddleston nen an inngaizawng zui a, an inngaizawng nasa ber awm e tih tur hial khawpin chanchinthar pawn an tarlang nasa. Hetiang hi ni mah se thla hnih vel chauh an inngaizawng. Mi tam tak chuan Taylor Swift hian hla phuah thar tur a nei leh nual turah an ngai.

A ngaihzawng line lam a lar ang bawka Taylor Swift chanchina lar leh chu Kanye West nena an inṭheṭhuna hi a ni. Kum 2009 aṭanga inkar fel tawh lo kha a ni a, nikum khan Kanye West-a nupui, Kim Kardashian West hian Taylor Swift leh Kanye West te inbiakna phone record a tichhuak a, hunrei tak chhung chu he thubuai hian chanchintharah hmun a luah.

The Voice-a mi ṭhin, Christina Grimmie an kah chungchang hian khawvela nghawr hle. Nikum June 10 khan Orlando, Florida-ah a comncert a, a zai zo hi Kevin James chuan a kap a, a kaptu hi Christina nuṭa, Marcus chuan bei zuiin, he an inbeihnaah hian Kevin James hi silaiin a inkap a, a thi ta a ni.

Amber Heard leh Johnny Depp te inṭhen hian chanchin a luah nasa hle bawk. Thla 15 an inneih hnuah inṭhenna thu buaipuiin court-ah an kal a, court chuan tihfelsakin, USD mtd 10 vel zet chu Amber Heard hnena pe turin court chuan Johnny Depp a hrilh.

Chanchin langsar dang­ah chuan Paris-ah Kim Kardashian an rawk a, mi tam takin an ring lo a, mahse a lo dik ngei a nih hmel. A pasal Kanye West chu damdawiinah dah luh a ni a, mahse a ṭha zel e.

April 21-a Prince a thih khan khawvel chu a ngui nghal nghuai. Kum 57 mi, zaithiam leh musician hi Minnesota-a a inah thi a hmuh a ni. Angelina Jolie leh Brad Pitt te inṭhen thu hian khawvel a fan chhuak nghal a, mi mak tih a ni.