Rose a chhuak ta

Leitlang Pictures kut chhuak Zonet original series Rose chu Nilaini zan dar 8 khan Zonet Zawlbukah premier a ni ta a, Mizo TV series hmuh­nawm tak a ni dawn tih a chiang.

Episode hmasa berah chuan hotel lian leh changkang takah mipa tu nge a ni tih hriat loh ruang chhar a ni a, mitthi chu tunge a ni tih hriat ni lo mah se a ipteah Rose tih thumal inziahna lehkha hmuh a ni.

Tun hmain Hotel-ah hian Lunglei mi Runpuii chu thia chhar a lo ni tawh bawk, a thihna an chhuinaah chuan mahni intihlum niin an ziak.

Rinpuii hi nula hmelṭha leh pian­nalh a ni ṭhin, hlimhlawp bawlna hmuna kal hrat ve tak niin Er Thang­sailova nen an inkawp a, an in­kawp thuk hnuah sorkar sum an tih ching­penna thlengin a inhnamhnawih ve. Thangsailova hian a ṭhianpa politi­cian pakhat nen Hydel project-a mi tur sum tam tham tak an tichingpen a, hengah pawh hian Rinpuii chu a inhnamhnawih. A hnuah erawh Rinpuii hi thahtir a ni tih a lang leh a, a thattu hian a kutah Rose tih inziahna lehkha them a hnutchhiah.

'Rose' tih thumal hian awmze thuk tak a nei dawn tih a chiang a, tualthihna nen engtiang takin nge a inzawm dawn tih hriat la ni lo mah se a laimu a ni tih chu a chiang. En chuunzawm chakawm takin a tawp zui bawk. Mizo zingah chuan film siam lama sulhnu nei ṭha ber pawl Mapuia Chongthu pawhin a film siam tawh zinga chhuanawm a tih ber pawl Rose hi Ningani zanah chhunzawm a ni leh dawn a, Episode hmasa ber ente chuan en chhunzawm leh an chak ngei ang.

Zonet director LV Lalthantluanga pawhin feedback an dawn ṭhat thu Vanglaini a hrilh. Rose hi Thawhlehni leh Ningani zanah Zonet Zawlbukah leh Zonet Bawhbelah pek a ni ṭhin dawn a. Zawlbukah hian dar 8-ah an pe ṭhin dawn a, Bawhbelah hian dar 9:30-ah an pe ṭhin dawn thung. TV lama thlir hman lo tan Zonet digital platform tv.zonet.in-ah subscription fee Rs 500 chawiin a en theih ṭhin dawn bawk a, tunah pawh hian episode 1 chu en theihin an dah reng tawh a ni. tv.zonet.in lamah hian TV lama tihchhuah a nih hma niah dah a ni ṭhin dawn bawk a, Zonet digital platform subscriber-te tan hamṭhatna a awm dawn.