Tunge George Michael?

Urlawk zan hlim taka kan hman a, Krismas tuka kan mut burh burh lai khan, Krismas a nih tawha a hla kan play ziah ṭhin, George Michael chu Oxfordshire, England-a a inah, ama khum ngeiah thia hmuh a ni; a thih chhan erawh hriat a la ni rih lo. Khawvelin zaithiam lar a chân leh ta.

A thih hian kum 53 mi chauh la ni mah se, music khawvelah chuan hnu hma a ngah a, hla ropui tak tak min hnutchhiah. A hla ‘Last Christmas’ erawh khawvelin Krismas kan hman chhung chuan kan play tawh hmel thung.

British mi a ni a, Greek thlah a ni. A hming dik tak chu Georgios Kyriacos Panayiotou a ni a, kum 1963 June 25-a piang a ni. Kum 1981 khan Andrew Ridgeley nen Wham! an din a, an hunlaia khawvel huapa pop duo lar an ni. Kum 1987 aṭang khan solo-in a kal ta thung.

Wham!-ah hian kum 1983 khan Fantastic album an ti­chhuak a, UK-ah chuan hemi kum hian album chart-a pakhatna a luah; he album-a an hla lar pakhat chu Tropicana kha a ni. A hnuah Make It Big album an tichhuak leh a, US-ah pawh he album hi pakhatna a ni thei. He album-a mi Careless Whisper phei chu tun thlenga khawvel huapa hla lar zinga mi a la ni thei. Kum 1985 khan China-a tour an nei a, chhinchhiahtlak a tling. Khaw­thlang popular music act, China-a awm hmasa ber a ni. Music from the Edge of Heaven a tichhuak bawk a, he album-a hla ‘Last Christmas’ chu khawvel huapa Krismas hla ṭha berte zinga mi a la ni reng.

Solo-a a kal hnuah kum 1990 khan Listen Without Prejudice album a tichhuak a, a album tihchhuah hnuhnun ber chu Twenty Five a ni a, a hla hit a dah khawmna a ni a, kum 2006-a a tihchhuah kha a ni a, UK album chart-ah pakhatna a ni thei.