Jack Harlow class a sáng, 'First Class' ngat!

Billboard Hot 100 chart-ah Jack Harlow 'First Class' chu a hot ber a, pakhatna a ni.

American rapper Jack Harlow hian Atlantic Records kaltlangin April 8 khan he hla hi a tlangzarh a, US lamah tla na nghalin Billboard Hot 100 chart-ah pakhatna a nihpui nghal hial. Harlow hian a hmain Lil Nax X nena 'Industry Baby' hmangin Hot chart topper dinhmun hi a lo luah dun tawh a, tunah erawh ama pual liau liauin 'First Class' hmang hian Hot 100 chart a thunun ve ta .

He hla hi US mai bakah Australia, Canada leh New Zeland single chart-ahte pawh topper a nihpui nghe nghe. Kumin chhunga kar khat chhunga US mipuite hla stream tam ber a ni bawk a, Drake-a'n nikum September thlaa a tihchhuah Future leh Young Thug a thawhpuina 'Way 2 Sexy' hnua kar khata hla an stream tam ber a ni.

MRC Data aṭanga a lan dan chuan tlangzarh a nih aṭanga kar hmasa Ningani thleng khan on-demand stream-ah vawi maktaduai 54.6 an stream a, hei hi kumin atan chuan record a ni hial.

Kar hmasa lama pakhatna Harry Styles 'As It Was' chu pahnihna a ni ve thung a, Glass Animals 'Heat Waves' pawhin ro a rel reng thei bik loa, pathumnaah a tla thla ve ta a ni.

Jack Harlow hi a vawi khatna atan Artist 100 chart-ah pakhatna a ni bawk a, 44-na aṭangin 'First Class' vangin pakhatnaah a rawn inhlang kai.

Billboard 200 chart-ah Lil Durk a rawn lang leh e
Lil Durk album '7220' chu Billboard 200 chart-ah pakhatna a rawn ni leh a, a zawn ni loin vawi hnih chart topper a ni ta.

Morgan Wallen album chuai thei lo 'Dangerous: The Double Album' pawh palina aṭangin pahnihna a ni leh tawh a, chart chung lama awm nuam a tilaklawh a, kar 66 chhung lai chu chart chung lamah hmuh tur a awm tawh.

Jack White album thar 'Fear of the Dawn' chu top 3-ah inhlangkai zo loin palina a ni ve bawk. Camila Cabello album thar 'Familia' chu 10-na a ni pha ṭawk a, album tlangzarh thar ho beisei angin an che ṭha viau lo a ni.

Billboard 200 chart top 10:-
1 7220 Lil Durk
2 Dangerous: Morgan Wallen
The Double Album
3 Encanto Soundtrack
4 Fear Of The Dawn Jack White
5 Sour Olivia Rodrigo
6 Certified Lover Boy Drake
7 Last Ones Left 42 Dugg & EST Gee
8 Planet Her Doja Cat
9 B.I.B.L.E. Fivio Foreign
10 Familia Camila Cabello

The Hot 100 top 5:-
1 First Class Jack Harlow
2 As It Was Harry Styles
3 Heat Waves Glass Animals
4 Big Energy Latto
5 Enemy Imagine Dragons X JID