'Twilight' hlawhtlinna mak titu Kristen Stewart

Kum 2008-a tlangzarh romantic fantasy film 'Twilight'-a changtunu Kristen Stewart chuan 'Twilight' film a hlawhtling chu mak a tih thu a sawi tlat mai!

Kum 32 mi, 'Twilight' film-a Bella Swan lema chan vanga hriat hlawh chhunzawm tak Kristen Stewart chuan 'Jess Cagle Podcast’-ah hemi chungchang hi sawiin, a chhunzawmna phei chu siam a nih a beisei loh thu a sawi. "Mi hnena sawi ka duh fo ṭhin chu Twilight movie hmasa ber kha a nihna takah chuan 'indie' a ni...Keini pawhin kan hre bik lo. Thil mak tak a ni, teen movie satliah ve tak kha a ni. Khatiang tak khan miin an hlut ang tih ka ring lo. A chhunzawmna phei chu kan siam ka ring lo hrim hrim," tiin a sawi.

Kristen Stewart hi kum 2008 leh 2012 inkar khan The Twilight Saga film series-ah a inlan vek a, Twilight film series panga laiah a inlan tihna a nih chu. 'Twilight' film-a a chan hma khan film eng emaw zatah inlan mah se hriat a hlawh lutuk ngai loa, 'Twilight'-a a chan hnuah erawh film star hlawhtling ber pawl ni chhoin a film channa apiang chuan ngaihven a hlawh chho ta zel a ni. Kuminah hian a channa thar ber 'Crimes of the Future' chu tlangzarh a ni ang.