Chester Bennington khan 'In The End' a ngaina lo

Linkin Park hla lar ber pawl leh an signature hla tih hial ngam 'In The End' kha an vocalist fam ta Chester Bennington khan a ngaina tlat lo.

Kum 2012-ah daih tawh khan VMusic-in an kawmnaah, "In The End fan ka ni ngai lo a, record (Hybrid Theory)-ah khan tel lo se ka duh a ni," tiin a lo sawi tawh mauh mai. Hetiang khawpa khawvel huapa an hla hit ber pawl nalh a ti lo hi mak ti pawh kan tamin a rinawm, mahse hun a kal deuh hnuah erawh a ngaina leh ta tho a. "Engang takin nge ka lo tihsual theih ang le? Khatih hunlai khan eng ngaihtuahna nge ka puta ka lo duh loh kha hrethiam lo, chumi a nih avang chuan talent nei ṭha tak, miin nalh an tih tur hre zawka ka ngaihte tlutlukna kha ka pawm mai a ni," tia sawi zawmin,"Chu chuan zirlai ṭha tak min zirtir a ni, artist ka nih angin, kan band-ah khan ka music ngaihthlak duhzawng ang ringawt kha siam tur ka lo ni lo. Mahse tunah chuan 'In The End' hi ka ngaina tawh hle a, hla ṭha tak pawh a niin ka hria. Hla ṭha tak a nihzia hi ka hmu thiam tawh a, mahse khatih hunlai kha chuan ka tan khan hmuh thiam kha a har a ni," a ti.

Mike Shinoda chuan Thawhṭanni khan Rock Sound TV hnenah 'In The End' a phuah dan chungchang sawiin, "Hollywood-a room te tak teah rehearsal kan nei a. Hollywood ka tih khan Hollywood kilkhawr ber lai a ni. "Reharsal room chhe te kan luah man kan pek theih tawk kan hmu ve a. Chutah chuan hla kan phuah ṭhin a, kan show neih tur atante kan inbuatsaih ṭhin. Chu building-ah chuan zanah ka riak a, 'In The End' hi ka ziak ta a. A tukah chuan Rob Bourton hnenah ka hmuh hmasa ber a, a hriatah ka play chhin a, ani chuan ṭha a lo ti hle a ni," tiin a sawi.

'In The End' hian tunhnai lawk khan YouTube-ah thlirtu tluklehdingawn a nei tling a, 'Numb' dawta hetiang zat thlirtu Linkin Park-in an neih hmasa ber a ni. Linkin Park hian tunhnai lawk khan Hybrid Theory album kum 20 tlin lawmna pualin eng emaw ruahmanna an siam thu an lo sawi tawh a, LP fan-te chuan an nghakhlel hle ngei ang. October 2017-a  Chester tribute concert an buatsaih hnuah khan Linkin Park member-te hi an la perform ho leh lo a, an kal zel dan tur official-in an la puang chiang lo a ni.