Kumin Q1-ah Netflix-in subscriber hloh hnem ; Password inhrilh ṭhin vangin subscriber an hloh a nih an ring!

Streaming giant Netflix chuan Thawhlehni khan kumin Q1 (January-March) report tichhuakin subscriber nuai hnih an hloh tih an sawi a, Q2-ah maktaduai hnih vel chu an hloh belh leh an la ring hial!

January thla khan report an tihchhuahah Netflix hian khawvel pumah subscriber mtd 221.84 an nei niin an tarlang a, Q1 report an tihchhuahah kumin Q1 chhungin 'Bridgerton season 2' leh 'The Adam Project' te tlangzarh mah se chu chuan hmasawnna a thlen zo loa, subscriber 221.64 an nei niin an tarlang.

Netflix hian quarter tinah report an tichhuak ziaha, tunṭum hi kum 10 chhunga subscriber an tlakhniam vawi khatna a ni nghe nghe.

Kumtir lamah rin lawk dan leh Wall Stream analyst-te chhut dan chuan Q1 chhung khan subscriber mtd 2.8 vel tal chu an neih belh rin a ni nachungin subscriber tam tham tak an hloh ta zawk a, hei hian ngaihven a hlawh zuiin mi tam tak a barakhaih hle.

Netflix stock hlutzawng hi Thawhlehni thleng kha chuan share khatah $348.42 zel a la ni a, report an tihchhuah hnuah erawh 25% laiin a tlahniam niin Variety chuan an tarlang zui bawk.

Subscriber tlakhniam chhan chu...
Netflix thuneitute chuan streaming service dang nen an inel boruak vangin subscriber chu an hloh niin an sawi a, chumi baka an puh lian tak chu password inhrilh ṭhin vang a ni.

An chhut danah chuan subscriber mtd 100 vel zet chuan midang hnenah an password an hrilh a, hemi vang hian account inhmanṭawm kawngah pawh khuahkhirhna siam an tum. CEO Reed Hastings chuan,"Nasa taka kan ṭhan lai kha chuan account inhmanṭawm hi ngaihmawh tham a ni loa, mahse tunah erawh hemi kawngah hian hmalakna tur nasa takin kan dap mek," a ti. Latin America lama account inhman ṭawm khuahkhirna an enchhin mek chu ramdangah pawh hman a ni mai thei tih a sawi bawk.

Netflix hian thla hmasa aṭang khan Chile, Costa Rica leh Peru-ahte chuan in khata cheng ni lote chu user profile an siam belh dawnin pawisa an chawitir tawh a ni.

Hei bakah hian Russia leh Ukraine indo vangin subscriber an hloh niin an sawi bawk. Netflix hian Russia lamah an service an titawp rih a, chu chu ni lo se Q1 chhung hian subscriber nuai nga vel tal chu an neih belh zawk an ring.