'Spider-Man: Across the Spider-Verse' Tlangzarh hun tur sawn hla

Kum 2018-a tihchhuah animated film hit tak 'Spider-Man: Into the Spider-Verse' chhunzawmna 'Spider-Man: Across the Spider-Verse' tlangzarh hun tur chu Sony chuan sawn hlain nakkumah an tlangzarh chauh dawn.

'Spider-Man: Across the Spider-Verse' hi ruahmanna hmasaah chuan kumin October 7-a tlangzarh tur a ni a, mahse Sony chuan Nilaini khan thuchhuah siamin nakkum June thlaah an tlangzarh zawk dawn tih an tarlang.

'Spider-Man: Across the Spider-Verse' hi Sony Spider-Man spin-off film 'Madame Web' tlangzarh hma thla khatah tlangzarh a ni dawn tih Sony chuan tarlangin, 'Madame Web' chu July 7, 2023-a tlangzarh tur niin 'Spider-Man: Across the Spider-Verse' chu June 2, 2023-ah an tlangzarh thung dawn. 'Spider-Man: Across the Spider-Verse' chhunzawmna hi an siam lehnghal dawn a, chu chu March 29, 2024-ah tlangzarh an tum thung.

December thla liam ta khan Marvel leh Sony Pictures lam chuan teaser an lo tichhuak tawh a, chutaṭanga a lan dan chuan Miles Morales/ Spider-Man (Shameik Moore) leh Gwen Stacy/ Spider-Woman (Hailee Steinfeld)-te chu kan hmu leh dawn tih a chiang. Antagonist Wilson Fisk/ Kingpin (Liev Schreiber) pawh a lang dawn tih a chiang tawh bawk.

Sony hian tunhnaiah film hit tak tak an tichhuak nual. Venom leh Tom Holland-a Spider-Man film series ho hit zia kan hria. Morbius erawh an beisei angin a che ṭha lo thung. Hetihlai hian Spider-Man universe erawh zauh zel an tum a, Venom leh Morbius an tihchhuah tawh bakah Dakota Johnson channa tur Madame Web pawh hma an la thui tawh hle a, chu bakah chuan Kraven pawh siam leh an la tum a ni.