Justin Bieber leh Dan + Shay '10,000 Hours' mi hla copy-ah puh

Justin Bieber leh Dan + Shay-te thawhhona hla hit tak '10,000 Hours' chu mi hla entawna phuahah puh niin heng artist-te lakah hian thubuai thehluh a ni.

Grammy awards hial pawh an lo dawn phah tawhna country hla mawi tak '10,000 Hours' chu company pakhat Melomega chuan kum 1980-a tihchhuah hla hit 'The First Time Baby Is A Holiday' entawnah an puh a, Ningani khan Los Angeles federal court-ah thubuai an thehlut. Thubuai thehluhah chuan vawi khat lek ngaihthlak pawhin hla pahnih chu a inang hle tih a hriat theih nghal niin an ziak.

Melomega chuan Bieber leh Dan + Shay laka thubuai an thehluh chu musicologist Dr. Alexander Stewart pawhin a thlawp tih sawiin Dr. Alexander Stewart chu hla pahnih a inang hle tih zirchiangtu leh a inang hle tih tichiangtu pawh a ni, an ti.

'10,000 Hours' hi October, 2019-a tihchhuah kha niin Billboard Hot 100 chart-ah No.4-te hial pawh a lo ni tawh a, kum 2021 Grammy Awards-ah khan Best Country Duo/Group Performance award hial an dawn phah a ni. An hla vanga khin an tawh chungchangah hian nimin thleng kha chuan Bieber leh Dan + Shay-te hian thusawi an la nei lo.

Tunhnaiah artist eng emaw zatin copyright lawsuit thubuai an nei a, Dua Lipa pawhin 'Levitating' vangin case pahnih a buaipui a ngai a, Ed Sheeran pawhin hmanni lawk khan 'Shape of You' thubuaiah thiam a chang bawk.