Kumin chhunga film sum lalut tam zual te ; Top 10-ah India film a lang ve!

Kum 2022 April thla chawhnu lam kan lo thleng leh ta der mai. Thla tam la liam lo mah se lemchan khawvelah erawh film tam tham tak tlangzarh a ni tawh a, amaherawhchu, Big Budget film tlangzarh erawh a la tam loa, kut zungṭang thliah tham lek a ni. Chung film hrang hrang zingah chuan tun dinhmunah chuan Robert Pattinson leh Zoë Kravitz channa 'The Batman' chu sum lalut tam ber a ni rih. Film lian thar tlangzarh tur kumin chhungin a la awm nual dawn tih erawh hre tel ila.

Hripui len hnuah film industry nasa takin a tlahniam a, movie lian tham siamtute pawhin tunhma angin sum an lalut tam thei loa, theatre lama en tura film chhawp chhuah pawh a tam lutuk ta lo. Khawthlang lam film industry a tlahniam kan tih lai hian China lam film industry erawh nasa takin a ṭhang thung a, kumin chhunga film tlangzarh sum lalut tam zual 10 zinga pali lai chu khawchhak lam film a ni hial! Amaherawhchu, China lam pawh hi tunhnaiah hripui vangin an buai thar leh a, chu chuan an film industry pawh a nghawng leh mek a ni.

Matt Reeves film $maktaduai 185-200 vel senga an siam 'The Batman' chuan ram hrang hrang aṭangin $753,223,000 lai sum a lalut tawh a, kumina film tlangzarh zingah chuan sum a lalut tam ber. A dawt chiaha awm Chinesefilm 'The Battle at Lake Changjin II' chuan $676,400,000 a lalut tawh a, pathumna pawh Chinese film tho 'Too Cool to Kill' a ni.

Record siam thei film pahnih chu
Telegu film 'RRR' chu kumin chhunga film tlangzarh sum lalut tam zual 10 zingah lang phakin 10-na a ni. He film hian record eng emaw zat a siam tawh a, India film zingah chuan sum lalut tam ber dawttu niin 'Baahubali 2: The Conclusion' chiah a pha lo. Tunah hian ram hrang hrang aṭangin $145,000,000 lai sum a lalut tawh. Covid-19 hripui len hnua India film zinga $mtd 100 lalut tling thei hmasa ber record a siam a ni.

Sum lalut tam pangana 'Sonic the Hedgehog 2' chuan video game film adaptation zinga tlangzarh kara sum lalut tam ber record a siam a, Jim Carrey channa film tlangzarh kara sum lalut tam ber a ni nghal bawk.

Kumin chhunga film, sum lalut tam zual 10-te chu:-
1 The Batman $753,223,000
2 The Battle at Lake Changjin II $676,400,000
3 Too Cool to Kill $411,600,000
4 Uncharted $389,689,237
5 Sonic the Hedgehog 2 $246,804,424
6 Nice View $216,030,000
7 Fantastic Beasts: The Secrets of Dumbledore $207,526,817
8 Boonie Bears: Back to Earth $151,350,000
9 Morbius $148,228,104
10 RRR $145,000,000