India ramah Will Smith

Oscar Award semna inkhawmah Chris Rock a ben vangin a chanchin khawvelin buaipui mah se amah tak erawh hmuh tur a awm meuh lo. Tunah erawh India ram lamah Will Smith chu mipui hmaah a inlan ta.

Will Smith hi Mumbai-a Kalina airport-ah Inrinni khan hmuh a ni a, paparazi eng emaw zatin lo hmuakin a fan ṭhenkhat thla a lakpui bawk. Oscar hnuah khan vantlang hmaah a la inlan leh lo a, Inrinni hi a inlan leh hmasak ber a ni.

Will hian a hma pawhin India hi a rawn tlawh tawh a, kum 2019 khan a reality show 'The Bucket List' shoot-in India ram hi a lo tlawh tawh a ni.

Hetihlai hian Chris Rock nu Rose Rock chuan,"Chris a ben rual khan kan zavaiin min beng a ni. Keipawh min beng a ni. Ka fa i tihnat chuan keipawh min tina a ni," tiin Zirtawpni liam ta khan South Carolina news station WIS-TV-in an kawmnaah a sawi a, hei hian ngaihven a hlawh zui hle.