Remkimi Cherput zai kan ngaithla leh dawn e

Mizo Idol hmasa ber aṭanga Zoafate'n kan hriat, a zai kan ngainat tak Remkimi Cherput chuan hun rei tak chhung hla thar a tihchhuah tawh loh hnuah music video thar a rawn chhawp chhuak dawn e.

Zirna avangin hun rei tak chhung music video a tichhuak tawh loa, tunah erawh hna thar ṭha tak nei tawhin hla thar nen Zoram rimawi khawvelah a rawn comeback dawn a ni. A hla rawn tihchhuah thar tur hi 'Nghak zel nang che' tih niin ama phuah ngei a ni nghe nghe a, ngaihthlak a manhla leh viau ang.

Blue Wave records lamah recording tiin music pawh a ngaihthlak tlak leh viauin a rinawm. Remkimi hian music a thiam tih kan hriat kha. Tuna a hla tharah pawh hian analog deuh hleka drum ri han siam chawpte pawh ngaihthlak tur a awm dawn a, a zai mai bakah music pawhin belhchian a dawl hle dawn a ni. Video erawh Tea Video Production kut chhuak a ni dawn thung.

Remkimi music video hnuhnung ber chu RTC Lalduhawmi phuah 'Zoawi Lelte a fam ta' kha a ni a, kum 2016 daih tawha a tihchhuah kha a ni. Tunah erawh ama hla ngei nen a rawn comeback dawn a ni. Blue Wave lamah hian project dang pawh a buaipui mek a nih hmel a, a guitar solo ngei ngaihthlakna tur project-te pawh a buaipui mek niawm tak a ni.