LGBT character awm vangin Saudi Arabia-ah 'Doctor Strange 2' chhuah khap

Marvel film thar, thla thara tlangzarh mai tura an ruahman 'Doctor Strange in the Multiverse of Madness' chu Gay character hmuh tur a awm dawn avangin Saudi Arabia lamah chuan chhuah an khap.

Variety lamin an tarlan dan chuan Saudi Arabia censor lam chuan Disney hnenah hemi chungchang hi tidanglam turin an lo ngen tawh a, mahse Disney lam hian an tihdanglam duh loh avangin an ramah chhuah phalna an pe dawn ta lo a ni.

Sam Raimi film thar turah hian Benedict Cumberbatch chu Doctor Strange lemah a chang leh dawn a, hero thar America Chavez (Xochitl Gomez), kan hmu dawn a, chu chu gay a ni dawn a, Saudi Arabia lam chuan hei hi an duh lo a ni.

'Doctor Strange in the Multiverse of Madness' hi May 5 hian US-ah tlangzarh a ni dawn a, Saudi Arabia leh Gulf ram dangah chuan May 6-ah tlangzarh turin ruahmanna an siam thung a. Saudi lamah erawh an tlangzarh ve dawn ta rih lo niin a lang.