Miss Mizoram January 17 aṭangin audition

Kumina Miss Mizo­ram thlan tur atan inpuahchah chhoh zel a ni a, district khawpui pathum - Lunglei, Champhai leh Kolasib-ah te January 17 hian audition round neih a ni tawh dawn.

Audition round neihna turah hian a khaw bula mite tel theih vek a ni a, district khawpui pathuma January 17-a audition neih a nih hnuah, January 20 hian Aizawlah audition neih a ni ve thung ang. Audition result hi January 27-a puan tura ruahman a ni. Audition Round-a judge te zingah tun­hnaia Mizo zinga Beauty Pagent contest-a thleng sang, Sunsilk Mega Miss NorthEast 2nd Runners-up Lallenpuii Ralte leh Emily Hmingthansangi te a bakah Miss Mizoram ni lai C. Vanlalsawmi te an tel dawn.

Miss Mizoram Contest-a tel tumte tan hian registration form lak chhuah a, January 14 (Inrinni) aia tlai lovah lak chhuahna hmunah thehluh leh tur a ni. Registration form hi Zonet Office, Aizawl; CCN, Champhai; JB Cable Network, Lunglei leh CZS Cable, Kolasib-ah te lak chhuaha thehluh theih a ni.

Audition pal tlang finalist-te hi chawlhkar thum chhung, Grooming session neihpui an ni ang a, he session-ah hian Contestant-ten kawng hrang hrang - an taksa, hawiher leh rilru lam thlenga hma an sawn theihna tura hun hmanpui an ni ang a, hetiang kawnga mi thiam bikte rawn an ni ang. Grooming session zawh­ah hian Contestant-ten intihsiakna round hrang hrang an hmachhawn leh ang a, chung intihsiakna result chu Grand Finale zanah puan a ni chauh dawn a ni.