George Michael-a music hralh kal

British zaithiam lar George Michael chu a thih hnuah a music-ten ngaihhlut thar a hlawh hle a, an hralh hnem phah hle.

December 29 chawlhkar chhung ringawt khan George Michael-a album leh Wham!-a an album tihchhuahte kha nasa takin an hralh belh a, chawlhkar khat chhungin a album leh hla an hralh zawng zawng hi 477,000 zet a tling chho thei. Heng zinga 429,000 hi a hla an hralh a ni. Billboard chhiar dan tharah hla mal an hralh hnem hian album pakhat hu hralh tlin theih zat a awm a, chutianga chhut chuan album tlukpuiin, album 103,000 hralh ang an ni. A hma chawlhkar nena khaikhinin an hralh hnem dan hi za zelah 2,071 zet a tling.

Hei mai bakah hian Michael-a solo album pathum leh, kum 1984-a Wham! rawn lar chhuahna album ‘Make it big return’ te chu Billboard 200-ah chart-ah an rawn lang thar bawk. Kum 2008-a a tihchhuah ‘Twenty Five’ chu 12-naah a lang a, kum 1987-a a tihchhuah Faith chu 18-naah langin, Ladies & Gentlemen: The Best of George Michael chu 84-naah a awm. Wham!-a an album ‘Make it big return’ chu 168-naah a rawn lang thar.

Single chart lamah pawh George Michael hi a rawn lar thar hle. Billboard Hot 100-ah ‘Careless Whisper’ chu 33-naah a rawn lang a, Wham!-a an hla hit ‘Last Christmas’ chu 50 aṭangin 41-naah a rawn kai chho bawk. ‘Faith’ hla pawh 47-naah a lang. ‘Careless Whisper’ hi kar hmasa chhung khan copy 53,000 an hralh.