Ṭhazual Fakna mipa aia Hmeichhe chungnun zawkna

Kum 2016 chhung khan Ṭhazual Fakna chart hi vawi 26 tihchhuah a ni a, pakhatna luahtu hi 14 lai an awm a, heng zingah pariat chu hmeichhia an ni. Pakhatna luah thei mipa pathum chauh an awm a, group pathumten pakhatna an luah bawk.

A mala pakhatna ni ngun ber chu One in Christ an ni a, hla pahnih hmangin vawi li lai pakhatnaah an awm. Mimala pakhatna luah ngun ber chu Grace Lalchhanhimi niin, ‘Rorelna Ni’ hmangin pakhatnaah hian vawi thum lai a awm thei. Mipaah chuan Andrew Laltlankima’n ‘Nunna Thar’ hmangin pakhatna vawi hnih a luah a, mipaa hlawhtling ber a ni.

One in Christ hian ‘Ni thar’ hla hmangin pakhatna vawi thum an ni a, chu bakah chuan ‘Min chhung khat leh ṭhin’ hla hmangin September 9 khan pakhatna an luah leh bawk. Group-a pakhatna luah thei dang chu Vohbik ‘Jordan lui’ leh Electric Veng Branch KṬP Matthaia Group ‘Ka ring zel ang che’ tih hlate kha a ni. ‘Jordan lui’ hla hi pakhatnaah vawi hnih a awm a, ‘Ka ring zel ang che’ tih pawh vawi hnih bawk pakhatnaah a awm.

Grace Lalchhanhimi, kum 2013-a Mizo Idol hian nikum khan music video a tichhuak tam lo a, nikum chhung khan ‘Rorelna Ni’ tih chauh hi TV-a kan hmuh theih a ni. A music video neih chhun erawh a hlawhtlingpui hle thung. ‘Rorelna Ni’ hi February 1 aṭang khan pakhatnaah kan hmu ṭan a, February 29 thleng khan pakhatna luahin, a zawnin vawi thum lai pakhatna a ni thei. Hmeichhe zing leh, mimalah chuan nikum chhunga pakhatna luah ngun thei ber a ni. Pakhatna luah thei dangte chu Feli Thangluah, Baby Malsawm­tluangi, Pensy, Rebecca Zorintluangi, Cindy Lalramhlimawmi, Stacy VL Muanpuii leh Lalremsiami te an ni.

Mipaah chuan Andrew Laltlankima’n pakhatna vawi hnih luahin mipaa pakhatna luah ngun ber a ni. Andrew-a’n pakhatna a luahna hla hi ‘Nunna Thar’ kha a ni a, he hla hi MP3-a a tih­chhuahna chu rei deuh tawh mah se, music video-in nikum khan a tichhuak chauh a, a hlawhtling hle. Nikum vek khan ‘Nunna Thar’ film chu October-ah tihchhuah a ni a, kha khan he hla hi a vawrh lehzual niin alang. Mipa zingah pathum chauhin pakhatna an luah thei a, TBC Zaithanpuia’n ‘Sul ni leh thla’ hmangin pakhatna vawi khat a luah a, Amtea hla ‘Ka thlang ber che’ tih chu pakhatnaah vawi khat kan hmu bawk.

Kum 2013 aṭangin Ṭhazual chart an siam ṭan

Kum 2013 chhung hian Fakna huang chhungah mipa leh hmeichhia an intluk tlang viau. Mimalah Duhsaki leh Andrew-a ten pakhatna vawi nga ve ve an luah

Kum 2014 chhung khan Ṭhazual Fakna chart vawi 26 tihchhuah a ni a, Chris MS Dawngkima, Lawma leh TBC Zaithanpuia te chauhin pakhatna an luah thei

Kum 2015 chhung khan mipa pathum chauh bawk pakhatnaah an awm thei. Albatross vocalist Elijah Lalrinawma, TBC Zaithanpuia leh Betea te chu pa­khatnaa awm thei mipa an ni

Fakna chart tihchhuah tawhah, Bethsy chu kum khat chhunga pakhatnaa awm ngun ber a la ni a, kum 2015 chhung khan a hla pali hmangin pakhatnaah vawi ruk ngawt a awm

Mipaah chuan TBC Zaithanpuia chauh kum tina pakhatna luah thei mipa awm chhun a ni