Lalthlengliani Jongte hla thar zaninah chhuak dawn

Lalthlengliani Jongte chuan zanin hian hla thar 'Mittui zawng zawng' chu a tichhuak dawn.

'Mittui zawng zawng' hi sap hla 'All my tears' , Rev Lalhunliana Royte lehlin a ni a, music and recording chu 3brother's recording studio-a a tih niin video chu Siama Hebron kut chhuak a ni thung. Zanin hian Zonet lamah music video thlira ngaihthlak tur a awm tawh dawn a, YouTube lamah pawh a awm thuai ang.

Lalthlengliani chuan,"Kum 2018 aṭang khan hyper thyroid vangin zai thei loin ka awm fo ṭhin. Doctor-te'n min enkawl a, a chang leh ka zai thei leh a, a chang leh ka zai thei lo leh a, eng emaw lai phei kha chuan ka ṭhiante ṭha taka an zai theite hi ka awt ṭhin khawp mai.

"He hla thunawnah hian 'Ka taksa zawng fam ro lungmualah zâl mahse a pawi lo ve, ka chatuanin ka thleng tawh ang, mittui zawng a hul tawh ang' tih a awm a, rilru na tak leh duh tawka zai chaka ka awm lai chuan helai thu hi ka nghakhlel ta hle a, ka dam velah ka record ta a ni," tiin he hla a sak chhan hi a sawi a ni.