Zaninah Driver Kima

In House Production buatsaih (an feature film 2-na) Driver Kima chu zaninah premiere a ni dawn, a khuhhawnna hi Hyve, Aizawl City Hall-ah sawm bikte nen neih a ni dawn a, film erawh a duh apiang tana en theih turin Lersia Play-ah zanin dar 8 aṭangin a en theih nghal dawn. Premiere programme hi In House YouTube channel lamah dar 7:30 aṭangin an live ang.

Mizo Film Award Best Actor Papuia Pachuau leh, Miss Mizoram lama mite hriathlawh Esther Sailo te an inlan dawn a, tleirawlte duh Green Rocket star Lil Toto leh Awmpui Thinchhia te bakah In-House Production feature film hmasa ber 'Ka Bialnu' a changtupa ber Lianpuia a inlan dawn bawk.

Driver Kima director Drew Pachuau chuan, "Mizo film dang aiin a kalhmang a danglam deuh dawn. Thil hlimawm leh hmangaihna lam chu a awm ngei ang a, chumi bakah khawsak dinhmun inthlau leh crime lam a tel bawk," tiin Vanglaini a hrilh.

In House Production hian nikum khan hlawhtling takin 'Ka Bialnu' tih film an lo ti chhuak tawh, mipui ngainat leh en a hlawh hle. Driver Kima pawh hi uluk taka buatsaih a ni a, a buatsaihtu lamin an beisei ang ngeiin Mizo mipui ten an hlutsak leh ngei pawh a rinawm.