Eddie Van Halen thurochhiahah Music charity tan $mtd 1 dah

Guitar legend fam ta Eddie Van Halen chuan a thuro chhiahah music education charity tan $maktaduai 1 a dah.

Veteran rocker, kum 66 mi nia kum 2020-a boral ta Eddie Van Halen chuan non-profit organisation Mr Holland's Opus Foundation (MHOF) tan sum tam tham tak hi a hnutchhiah a ni.

Kum 1995-a film tihchhuah 'Mr Holland's Opus hmingchawia pawl din hian chhungkaw sum lakluh tlem takte fate tan musical instrument an hman turin an buatsaih sak ṭhin a, music lam an zir theihna turte pawhin hma an la bawk ṭhin. Van Halen sum pek hmang hian kawng tam takah an ṭangkaipui thei dawn a ni.

MHOF CEO Felice Mancini chuan thuchhauh siamin,"Kum eng emaw zat chhunga Eddie min thlawpna hi kan tan leh a fan-te tan chuan a hlu tak zet," tia sawiin Eddie chhungte chuan an foundation kaltlangin a sulhnu chhawmnungin a awm zel dawn tih an ring ngam tih a sawi bawk.

'Jump' hitmaker Eddie hian a boral hma khan MHOF hi a lo ṭanpui fo tawh a, kum 2012-ah khan guitar 75 lai a lo pe tawh bawk a ni.