Bollywood mi ropui Om Puri a thi

Bollywood khawvela hnuhma ngah Om Puri chu nimin zing khan heart attack-in Mumbai-a a in, Lokhandwala-ah a thi. Om Puri thihna hian Bollywood chu a nghawr nghing a, tunlai Bollywood mi ropui tak takte pawhin amah an uina thu an tichhuak nghal.

Kum 1950 October 18-a piang Om Prakesh Puri hi India film-ah chauh ni loin British leh American film-ah te pawh hnuhma lo nei tawh a ni. Film industry-a a hnathawh avang hian India sorkar chuan Padma Shri a hlan bakah Britain sorkar chuan Order of the British Empire a lo hlan tawh bawk.

Punjab-a Ambala-a piang Puri hi kum 1976 khan Marathi film, Ghasiram Kotwal-ah a chang ṭan a, hemi hnu hian film chi hrang hrang a chang zui a ni. Kumin thlengin film a la chang. A film channa lar zingah chuan kum 2015-a Jai Jawaan Jai Kisaan-ah Dr. Rajendra Prasad lem a chang a, hemi kum vek hian Bajrangi Bhaijaan-ah Moulana Sahab lem a chang. English film eng emaw zat a chang tawh bawk.

Lemchan lama a hlawhtlinna avang hian Filmfare award chi hrang hrang a dawng tawh a, My Son the Fanatic hmangin Brussels International Film Festival-ah Best Actor a dawng tawh bawk. The British Film Industry-a lemchan lama hnuhma a neih ṭhat em avangin British chawimawina Order of the British Empire hlan a ni. Hei bakah hian English film East is East-a a chan ṭhat avangin BAFTA Award-ah Best Actor in Leading Role-ah nominate a lo ni tawh bawk.