US Box Office tana kar tawp lungchhiat thlakah 'Freaky' bawk pakhatna a ni leh

Khawthlang ram, a bikin US-ah khuan Thanksgiving hma chiah kar tawpah hi Box Office hlawk hun a ni ṭhin. Nikum khan hetiang hunah hian Disney film Frozen II khan $makatduai 204.9 lai a lalut a nih kha. Film industry tan chuan kar tawp nghahhlelhawm a ni ṭhin.

Hripuiin khawvel a sawi nghing a, khawvel economic a tlachhia a, film industry sum lakluh pawh a tlem hle. Kar tawp liam ta, kumdanga kar tawp nghahhlelhawm ni ṭhin kha kuminah erawh kar tawp lungchhiat thlakah a chang a, September thlaa Tenet tihchhuah a nih hnua North America Box Office sum lakluh tlem ber ṭum niin hemi ṭum hian chart hmasa lama pakhatna 'Freaky' bawk khan sum a lalut tam leh ber a ni.

Freaky Friday behchhana film siam Freaky hian $1,281,150 a lalut a, heti chung hian pakhatna a la ni phak tho. Theatre tam ber US-ah khuan khar a ni leh tawh a, Freaky pawh hi theatre 2,057-ah chiah an pe chhuak thei a, film dang theatre 2k chuanga an pek chhuah a awm lo.

Jackie Chan channa Vanguard chuan $400,000 chiah a lalut a, theatre 1,375-ah chiah pek chhuah niin Box office-ah pasarihna a ni pha ṭawk. Ropui taka tlangzarh a ni lo bawk nen Vanguard hi a che ṭha tawk lo hle.

Nikum August thlaa premiere daih tawh The Last Vermeer chu Zirtawpni liam ta khan theatre-ah tlangzarh a ni ve bawk a, $225,691 lalutin pakuana a ni.

Anime fan-te chuan an hmelhriat em em tur Fate/stay night: Heaven's Feel III. spring song chu kar hmasa khan US-ah tlangzarh a ni a, Box Office top 10-ah a lang. Fate/stay night: Heaven's Feel trilogy tawpna tur hi theatre 304-ah chiah tihchhuah a ni a, $200,000 a lalut a ni.