Beisei loh lam aṭangin 'The Bad Guys' a rawn inlar

Box Office-ah beisei loh takin DreamWorks Animation computer-animated crime comedy film 'The Bad Guys' chu sum lalut tam ber a ni.

Kar hmasa lamah khan budget sang tak film 'Fantastic Beasts: The Secrets of Dumbledore' chuan US Box Office chart-ah ro a rel a, kar khat chiah ro a rel hman tihah 'The Bad Guys' hian a rawn nek chhuak a, a nek chhuak mai ni loin, kar tawp liam ta chhung khan 'Sonic the Hedgehog 2' aiin sum a lalut tlem. Chart-ah pathumnaah a tla thla daih.

Box Office Mojo lam phei chuan an 'Mangṭha mai le Fantastic Beast, kan hre ṭha hman lo hle mai che' tiin an ziak hial a, film critics lam mit a tlung lo sa viau a, sum lakluh kawngah pawh beisei a pha lo chho hle dawn niin a lang.

'The Bad Guys'
Tun kar tawp liam ta chhung khan theatre 4,008-ah chhuah a ni a, $23,950,245 lai sum a lalut. Ram dang aṭanga a sum lakluh nena belhkhawm phei chuan $mtd 87.5 chuang sum a lalut der tawh a, film siamna atana an sum sen $mtd 80 chu an khum chiang tawh hle.

Critics lamin he film hi an fak tlangpui a, Rotten Tomatoes lamah chuan mi 129 review aṭangin rating 6.8/10 a hmu a ni.

'The Northman' leh 'The Unbearable Weight of Massive Talent'
Historical action drama film 'The Northman' chuan $mtd 12 vel sum lalutin palina a ni.

Alexander Skarsgård, Nicole Kidman, Claes Bang, Anya Taylor-Joy, Ethan Hawke, Björk, leh Willem Dafoe-te channa film hi sum lalut tam pathum zingah lang phak lo mah se film review-tute mit erawh a tling a, rotten tomatoes lamah mi 258 laiin review-in rating pawh 7.7/10 lai a hmu.

Comedy film Nicolas Cage channa 'The Unbearable Weight of Massive Talent', $mtd 30 lai senga an siam chuan kar tawp liam ta chhung khan $7,131,703 a lalut a, pangana a ni. He film hi review lamah an fak a, Rotten Tomatoes lamah rating pawh 7.3/10 lai ni mah se a sum lakluh erawh a tam lo hle.

Box Office top 10:-
1 The Bad Guys $23,950,245
2 Sonic the Hedgehog 2 $15,654,119
3 Fantastic Beasts: The Secrets of Dumbledore $14,002,190
4 The Northman $12,290,800
5 The Unbearable Weight of Massive Talent $7,131,703
6 Everything Everywhere All at Once $5,425,446
7 The Lost City $4,337,356
8 Father Stu $3,325,508
9 Morbius $2,307,137
10 Ambulance $1,794,210