Twitter leitu tur Elon Musk!

Khawvela mi hausa ber Elon Musk chuan Twitter a lei dawn niin a lang ta.

Khawthlang lam media hrang hrangin an tarlan dan chuan Elon Musk hian $tluklehdingawn 44-in Twitter hi lei a tum a, hei hi Twitter board lam pawhin an remti tawh niin an sawi bawk.

Kar hnih vel liam taah khan Musk hian Twitter lei tur hian 'bid' a lo siam tawh a, Twitter-ah chuan theihna tam tak hai chhuah tur a la awm thu a sawi zui bawk a ni. A tirah chuan Twitter lam hian an chhang ṭha duh vak loa, mahse tunah erawh inremna siam turin shareholder-te vote an la dawn tih BBC chuan a tarlang a ni.

Forbes-in tunhnaia khawvela mihausa tawntaw list a tihchhuahah Elon Musk hi pakhatna ani a, $tld 273.6 vel lai a nei niin an chhut a, electric lirthei a siam chhuahna company Tesla leh SpaceX-te chu a sum hmuhna lu ber a ni.

An indawrna chungchang a puanzarnaah Musk chuan,"Democracy kalpuina tura lungpui pawimawh ber chu zalen taka duhzawng sawi theihna (Free speech) hi a ni," tiin a sawi a, Twitter a lei theih chuan a hawilam tur chu hei hian a tichiang viau awm e.

Twitter chu tunhma zawng aia changtlunga siam a duh thu sawiin feature thar, rintlak zawka hman a nih theihna tura algorithms open source siam leh spam bot-te tihrema mihring ngei hlutna siam belhchhah chu a tum a nih thu a sawi.

Elon Musk hian tunah hian Twitter lamah hian follower maktaduai 84 chuang a nei a, tweet sawi zui hlawh tak leh ngaihven hlawh tak takte pawh a lo nei zeuh zeuh tawh ṭhin a ni.