Spider-Man spin off 'El Muerto'-ah Bad Bunny

Sony chuan Spider-Man spin off film thar 'El Muerto' an siam dawn tih sawiin, El Muerto lemah chuan Latin Grammy winner leh platinum-selling recording artist Bad Bunny chu a chang dawn.

Hemi chunchang hi CinemaCon, Las Vegas-a neihah an puangzar a, Sony panel-ah rin loh takin Bad Bunny chu rawn inlanin he film-a a chan dawn chungchang hi an puangzar ta a ni.

El Muerto aka Juan Carlos hi super power nei wrestler a ni a, comics lamah chuan charity wrestling match-ah Spider-Man nen inbuanin Spider-Man hmaikawr pawh a phelhsak ṭep hial a ni. A tirah chuan an inmil lo hle a, mahse Spider-Man chuan a hmelma El Dorado lakah a nunna chhanhim sakin chumi hnuah chuan Dorado bei turin an thawkdun zui a ni.

Sony hian Spider-Man universe nasa takin zauh an tum tih a hriat a, El Muerto hi Latin superhero, Spider-Man universe-a ama puala film puitling nei hmasa ber tur a ni a, hmeichhe character ama puala film nei hmasa ber tur Madame Web pawh tunah hian an buaipui mek bawk.

Hlawhtling takin Sony hian Venom an lo tichhuak tawh bawk a, tunhnaia an tihchhuah 'Morbius' erawhin fak a hlawh tehchiam lo thung. Aaron Taylor-Johnson channa tur 'Kraven the Hunter' pawh tunah hian an buaipui mek a ni.

CinemaCon-ah hian Sony chuan Venom 3 leh Ghostbusters 5 pawh an buaipui leh mek tih an sawi bawk a, Venom lamah hi chuan Tom Hardy pawh a inlan leh nghei hmel.